Dasper il president actual Adrian Steiger che vul restar vinavant en uffizi, aspireschan era Martin Hug e Nicola Fantini per il post da president. Il suveran da Flem ha uschia ina vaira elecziun.
Ils candidats sa preschentan
A chaschun d’ina discussiun al podium en l’arena da la Chasa d’Uaul ha la populaziun da Flem pudì sa far in maletg dals candidats. En pliras rundas da preschentaziuns e dumondas han els explitgà lur tenuta.
Adrian Steiger, il president communal actual, ha gì la posiziun la pli difficila. El è gia otg onns en uffizi ed ha uschia stuì sa schar mesirar vid sia prestaziun. El è savens stà en la defensiva e ha stuì giustifitgar differents projects dal passà. Sia moda e maniera da communitgar è savens vegnida crititgada da ses dus concurrents per il presidi.
Nicola Fantini abitescha dapi otg onns a Flem. Tar el han ins sentì ch’el n’ha anc betg tut las enconuschientschas pertutgant la politica communala e las tematicas che muventan Flem. El è sa focussà fitg sin la tematica dal Prau la Selva, e sin la colliaziun da Cassons cun ina nova pendiculara. Pia plitost ils temas actuals che brischan als da Flem sut las unglas.
Martin Hug è enconuschent a Flem. El è stà ils davos ventg onns mainafatschenta da l'Arena Alva. Quai post ha el visà la fin da fanadur da quest onn. La vischinanza tar la Arena Alva procura tar intgins da Flem per malesser. Hug è in bun retoricher. El era sa preparà fitg bain ed i n'ha dà nagin mument nua ch’el fiss stà malsegir.
Quai è elecziun – eleger tranter trais
Ils 27 da settember ha la populaziun da Flem d'eleger lur president – el vair senn dal pled. I pudess tgunsch capitar che nagins dals candidads cuntanschan en l'emprim scrutini il pli absolut. Ina tendenza per l'eventual segund scrutini è lura dentant segir visibla.