39 exposituras ed expositurs han mussà lur products e prestaziuns en il center da la citad da Glion a chaschun da l'exposiziun «Primavera». L’exposiziun ha gì lieu per la quarta giada da l'Uniun da commerzi e mastergn Glion e conturn. E l'uniun è satisfatga cun il dumber da visitadras e visitaders, l'interess saja stà grond. Uschia duai dar l'onn proxim ina tschintgavla «Primavera».
-
Bild 1 von 2. Bildquelle: FMR.
-
Bild 2 von 2. Il Spital regiunal Surselva è sa preschentà cun il directur Fadri Bisatz che ha respundì dumondas dal publicum. Bildquelle: FMR.
Tenor Franca Strasser, la presidenta da l'Uniun da commerzi e mastergn da Glion e conturn, è l’exposiziun da primavaira ina da las sulettas exposiziuns sut tschiel avert en il Grischun.
Mintgatant dovri pli ditg fin ch'insatge nov chatta il sustegn dal publicum
La Primavera haja stuì surmuntar intgins obstachels per sa cumprovar. L’emprima exposiziun ha gì lieu il 2021, a l'ur da la pandemia, raquinta Franca Strasser.
Suenter la premiera hajan ils organisaturs stuì dar pled e fatg daco ch’ins fetschia uss ina exposiziun dad in di e desistia da la ILHGA ch’era sa cumprovada e che durava quater dis. «La Primavera n'è nagina alternativa per la ILHGA da pli baud», di la presidenta da las 160 commerziantas e commerziants da Glion e conturn.
Perquai che nagin da nossa uniun n'ha pli vulì far la ILHGA cun ina gronda investiziun da temp e daners, avain nus ponderà tge alternativas ch’i dess.
Bikes, autos ed uras
En il focus da l'exposiziun dal 2025 èn stads autos e bikes. Da la partida eran set garaschas cun lur novs models. Tgi che sa fatschenta en il mument cun novs products per il curtin e per il balcun è stà en il dretg lieu cun visitar l’exposiziun da la butia da ferramenta e dal tegnairchasa Zinsli.
Da la partida è era stada la Expert Surselva che represchenta principalmain la branscha da radio, televisiun e telefonia mobila. Plinavant èn sa participadas las apotecas, drogarias, la papeteria Maggi, il Spital regiunal Surselva sco era La Naturopata. La fatschenta da famiglia Caveng ha festivà ses 150avel onn d’existenza a la Primavera 2025.
Las visitadras ed ils visitaders han era pudì prender invista da la lavur dals pumpiers dad Ilanz/Glion u era admirar il vehichel electric Terren che ha cuntanschì l'onn 2023 il record mundial d'autezza per vehichels electrics en il Chile.
Moda e program per uffants
Tenor la broschura d’infurmaziun da la Primavera datti era ina exposiziun da moda speziala. Preschentada vegn la moda da segund maun da la stizun La Trucca che che tutga a l’uniun da dunnas da Glion. Davart ils pli novs arranschaments da fluras survegn ins invista tar las duas fatschentas da fluras Candinas e Calamandrin. Ed era per las visitadras ed ils visitaders pitschens datti program a la Primavera 2025. Quai cun giugar cun l'excavatur en la sablunera surdimensiunada u cun sa laschar smincar. Ultra da quai datti ina paraid da raiver per cumprovar tgi che ha la megliera furma.
Communicaziun e dimensiuns per exponer
Sco quai che la presidenta da l’uniun da commerzi e mastergn Franca Strasser ha ditg, vul il comité d’organisaziun era quest onn trair ina bilantscha e conclusiuns ed optimaziuns per la proxima exposiziun. «Per la Primavera da quest onn avain nus creà in meglier flyer cun dapli infurmaziuns en il stil da telegram. E lura avain nus era empruvà d’optimar ils plazs d’exposiziun, uschia che mintga expositura ed expositur ha plazza avunda era per retschaiver il publicum.»