Ilanz/Glion - Exposiziun «primavera 2024»

Ils 13 d’avrigl 2024 ha gì lieu durant il di l'exposiziun da commerzi e mastergn annuala «primavera» a Glion. Passa 30 stizuns ed interpresas da la regiun èn sa preschentadas cun ina purschida vasta e cun numerusas attracziuns. L'aura sulegliva e las temperaturas agreablas han attratg blers visitaders indigens e d'ordaifer per in gir tras las differentas purschidas u per sa far patgific cun mangiar e baiver en il center da la citad.

Impressiuns «primavera 2024»

«primavera» – ina exposiziun particulara

La «primavera» ha envidà visitadras e visitaders ad in’exposiziun cun novaziuns multifaras ed ina sentupada patgifica en l'emprima citad sper il Rain. L’exposiziun è vegnida organisada da l’uniun da commerzi e mastergn da Glion e conturn. L'intent era da stgaffir in spazi cumadaivel per sentupadas tranter las persunas da fatschenta e la clientella. Era ils uffants n'èn betg vegnids a la curta. Els han dastgà tadlar las paraulas captivantas da la chasarina Greta, laschar smincar cun colurs e traglischur u tarmagliar en la sablunera surdimensiunada amez via.

Per l’emprima giada è la Via dal Glogn vegnida serrada per il traffic ed uschia averta per expositurs da las fracziuns da Glion e la clientella.

Cun gas cumplain en il futur professiunal

In’ulteriura attracziun han purschì las set garaschas d’auto ch'han preschentà lur autos en differents lieus en il ravugl da la «primavera». I stevan gnanc ils vehichels en il focus, mabain las emprendistas ed ils emprendists dals manaschis. Tge fa atgnamain in mecatronist d’auto u ina spezialista d’auto? Emprendistas ed emprendists devan persunalmain scleriment, dentant anc pli spectacular virtualmain.

Commerzi en l'internet augmenta squitsch sin las butias regiunalas

Bleras butias indigenas sentan l'influenza dal commerzi online sin lur svieutas. Perquai dattan ellas oravant tut pais a contacts persunals cun la clientella u han chattà vias da sa distanziar cun purschidas spezialas da la concurrenza en la rait.