Ils 18 da matg ha la populaziun da Glion d'eleger ils gremis politics. Sin il temin d'abdicaziun n'ha nagin da la suprastanza dà giu ses post. Tar il parlament communal vesi dentant ora tut auter. Dals 25 parlamentaris ston otg chalar pervia da la limitaziun dal temp d'uffizi. Sis ulteriuras persunas han annunzià la fin da lur engaschi en il parlament.
Nagina tensiun
Il president communal actual Marcus Beer aveva annunzià gia il favrer ch'el candideschia puspè per il presidi communal. Sin la glista da candidats e candidatas che la vischnanca da Glion ha publitgà è da vesair ch'i na dat il mument nagin cuntracandidat u cuntracandidata.
Sumegliant vesi ora tar la suprastanza communala. Hanspeter Bundi, Martin Capeder, Caroline Curschellas e Michal Hohl ch'èn actualmain en uffizi candideschan danovamain. Sper ellas ed els na datti naginas ulteriuras candidaturas. Uschia pon tant la suprastanza sco er il president communal quintar cun ina reelecziun.
Tschintg sezs libers per il parlament
Ina pli gronda midada datti en il parlament communal. Quel ha a Glion 25 sezs. Da las persunas en uffizi chalan 14, otg pervia da la limitaziun dal temp d'uffizi. Sper las 11 persunas che vulan restar en il parlament datti il mument sulet nov novas candidaturas. Cun quai mancan il mument anc tschintg candidats u candidatas per occupar tut ils sezs en il parlament.
Cun dar in'egliada sin la glista da candidats e candidatas per il parlament communal croda en egl che la fracziun da Glion tschenta cun 11 candidaturas la maioritad, Rueun ha il mument trais candidats e las ulteriuras fracziuns mintgamai in u ina. Senza represchentanza fissan il mument las fracziuns da Riein, Sevgein, Schnaus, Duvin e Pigniu.
Tar la vischnanca da Glion èsi era pussaivel d'eleger persunas che n'èn betg sin la glista da candidaturas. Uschia poi dar surpraisas anc enfin il di d'elecziun ch'è ils 18 da matg 2025.