La situaziun da partenza era speziala: L’atun passà eri vegnì enconuschent che l’Uniun da chant chantunala instradeschia ina revisiun dals statuts. Tranter auter cun la finamira che districts da chant inactivs e cun posts vacants possian surdar lur incumbensas a l’uniun chantunala.
Tar il District da chant Surselva era dapi in temp il post da cassier vacant, e latiers aveva il president René Buchli demissiunà. Uschia n'eri betg cler, co vinavant.
L’alternativa è da schliar il district e l’integrar en l’uniun chantunala. Quai vulain nus evitar.
La radunanza da delegadas e delgads ha però pudì evitar ch'il district sa schlia ed ha elegì Daniel Pally da Danis sco nov president dal district. El suonda a René Buchli da Laax ch'aveva demissiunà suenter sis onns al timun. Sco cassiera è Alice Bertogg da Sevgein vegnida elegida, e l'actuara Maria Candinas-Derungs cuntinuescha sia lavur. Da nov en la cumissiun da musica è Flavia Walder da Sevgein, ed Albert Spescha è reelegì.
897 chantaduras e chantadurs – puspè damain
Las 41 delegadas e delegads han represchentà ils 30 chors commembers da l’uniun tetgala sursilvana. Sco quai ch’il president partent ha informà, è il dumber da chantaduras e chantadurs sa sminuì per la fin dal 2024 sin 897 commembras e commembers. Quai èn 52 damain che l'onn avant - pia in minus da stgars 5%. Il december passà ha il chor maschadà «Las Vuschs dil Rein» annunzià da sa schliar.