En il lavuratori da l'Argo a Glion prendan mintga di tschintg lavurants cun differents impediments dapart maschinas electronicas veglias. Al di èn quai per lavurant en media 3 fin 5 maschinas da lavar giu, tumblers u maschinas da lavar. In d'els è responsabel per prender dapart visurs. Cun martè, tirastruvas ed autra iseglia vegnan demontadas tut las maschinas en lur tocs singuls. Quels vegnan lura sortids e separads tenor materialias en containers gronds.
Coi vegn sortì
-
Bild 1 von 4. Ina maschina da lavar pronta per prender dapart. Bildquelle: RTR.
-
Bild 2 von 4. Ils differents tocs d'in computer. Bildquelle: RTR.
-
Bild 3 von 4. Las stgatlas cun iseglia. Bildquelle: RTR.
-
Bild 4 von 4. Ils containers per sortir ils differents materials. Bildquelle: RTR.
Ils containers cun differentas materialias vegnan lura manads vinavant ad autras firmas pli grondas per vegnir reciclads vinavant. Singula rauba, sco tocs da plastic da las maschinas, na po betg pli vegnir reciclada. Quests tocs van ad Untervaz tar la GEVAG, nua ch'i vegnan brischads.
Avant gieva tut la via lunga – ussa va tut vias pli curtas.
Che maschinas electronicas vegnan demontadas a Glion, n'è betg adina stà uschia. Pli baud gievan las maschinas ruttas entiras tar autras firmas. Dapi in pèr onns lavura la firma Montalta ensemen cun l'Argo da Glion per prender dapart las maschinas anc en la regiun, avant ch'i van enavant tar autras firmas.
Quai ha plirs avantatgs: D'ina vart resta uschia dapli lavur en la regiun e l'Argo po qua tras porscher a ses clients in'occupaziun. Per quai èn els fitg engraziaivels, conferma il manader da l’Argo a Glion Corsin Bargetzi. Ed en pli pon ins uschia reducir ils viadis ch’il material fa per vegnir reciclà. Quai è meglier per l’ambient, di il manader da la gruppa Montala, Manuel Montalta.