Dapi passa dus onns ha l'ARGO lavuratoris a Schluein. En quests vegn fatg fitg differentas lavurs, uschia per exempel lavurs da pachetadi, ma era lavurs da metal per l’industria. In ulteriur segment è l’entir recicladi che sa chatta era en questas localitads nua ch’il center da fitness sa chattava blers onns.
Il mument hajan els ina gronda part da las maschinas grondas, sco maschinas da lavar resti, u maschinas da lavar vaschella che vegnan furnidas a l’ARGO per lascher prender dapart. Ma tut il potenzial na vegnia anc betg nizzegià, uschia ha Franco Hübner, mainafatschenta da l’ARGO infurmà ils preschents a Schluein. Envidà eran represchentantas e represchentants da las vischnancas, ma era da las medias e la regiun Surselva. Vegnids èn sulettamain dus represchentants da vischnancas sursilvanas. Hübner avess spetgà daplirs, ma trumpà na saja el betg, ha Hübner ditg sin dumonda da RTR.
In project dal cor per Manuel Montalta
In dals motors davos quest project è Manuel Montalta u meglier ditg l’interpresa da transports Montalta. Impurtant saja da pudair furnir il material da recicladi e d'uschia mantegnair la plivalur economica era en la regiun. Perquai haja l’interpresa, ensemen cun l’ARGO, sviluppà gia il 2021 in concept per porscher occupaziuns che fetschian senn e che sajan era sfidas interessantas per ils clients da l’ARGO, uschia Manuel Montalta. In impurtant pass è succedì avant radund dus mais, dapi lura è era la regiun Surselva participada al project. La finamira è da demontar en l’avegnir radund 2’000 maschinas grondas a Schluein, quella n’hajan ins anc betg cuntanschì ma cun il partenari nov sajan els sin buna via, uschia han Franco Hübner e Manuel Montalta declerà communablamain.
Finamira è che tut las vischnancas en Surselva sa participeschan
Nizzegiar il potenzial da la regiun en la regiun, quai saja la finamira principala, uschia Hübner. Il mument hajan els circa 70% dal material da maschinas grondas per demontar a Schluein. Ma per el saja cler che pliras vischnancas hajan per exempel contracts cun interpresas da dismessa e quels stoppian ins resguardar, ma cura che quels stoppian vegnir renovads, lura fiss la finamira che las vischnancas en Surselva resguardian il project inclusiv, di Franco Hübner. Per els veglia quai dir, far attent sin il project e la finala era mussar ch’els sajan abels d’ademplir las spetgas e quai hajan els fatg ils ultims onns.