Curs da rumantsch - Dar la pussaivladad da discurrer ed udir il lungatg

Dapi passa 50 onns porscha la Fundaziun Retoromana Pader Flurin Maissen curs da rumantsch Sursilvan. L’emprim eran quels a Rumein, suenter alura blers onns a Laax en la chasa Caltgera e dapi intgins onns èn ils curs da stad da rumantsch a Glion en la claustra. Nus avain bleras participantas e participants che vegnan adina puspè e noss curs da stad e da l’autra vart bleras novizas e novizs. Ed ina retschertga la stad passada ha mussà che bleras e blers appreziassan da survegnir ina purschida da curs era avant la proxima stad, per exempel l’atun, uschia il responsabel per ils curs Conradin Klaiss. Perquai han ins uss purschì in curs pli pitschen a Curaglia e quel saja stà in success, uschia Marisa Thöni ch’instruescha communabel cun Conradin Klaiss las 12 participantas e participants.

Idea è da porscher cuntegns e betg livels

Mintgina e mintgin ha pudì sa decider tge ch’el vul far e quant intensiv ch’el ni ella vul emprender, declera Marisa Thöni. Tuttina è svelt sa mussa che quai dat duas gruppas, ina dals avanzads e l’autra da talas persunas ch’entschaivan ad emprender il lungatg. Ma surtut saja vegnì dà paisa al udir il lungatg e la finala era al discurrer communabel. Uschia saja era stà ideal d’esser en localitads d’hotel nua che quasi tuttas persunas discurran rumantsch, perquai uschia hajan ins pudì exercitar il lungatg era ordaifer il curs.

Per las participantas ed ils participants èn surtut las gruppas pli pitschnas stads in avantatg e l’atmosfera famigliara a Curaglia. Sche quai vegn a dar ina cuntinuaziun cun ils curs d’atun è il mument anc betg cler, di Conradin Klaiss, ma l’idea saja da cuntinuar. Tge ch’ins po gia dir è che quai vegn a dar ina fin d’emna il favrer cun persunas gia avanzadas en l’instrucziun e quai en claustra a Glion ed alura era ils curs da stad tradiziunals.

Fatgs e cifras davart il rumantsch:

Or da l'archiv: