En la branscha da cuschiniers èn las cuschinas grondas en chasas da tgira u era en ospitals betg las cuschinas nua che la culinarica gronda vegn. Gist quai maletg vul il cuschinier da la chasa da tgira Puntreis a Mustér midar. El cumbattia cunter quai maletg sbaglià e cun sia participaziun e qualificaziun haja el mussà che la cuschina na sa differenzieschia betg d’ina cuschina da gourmet, uschia Fatmir Spescha. El è sa qualifitgà per il mezfinal da la pli gronda concurrenza da cuschiniers en Svizra. Cura ch’el haja udì ch’el stettia en il mezfinal saja el stà fitg losch e satisfatg, ma squitsch na sentia el betg, uschia il capo cuschinier. La concurrenza era gronda, passa 100 cuschinieras e cuschiniers èn sa participads e Fatmir Spescha è il sulet Grischun ch’ha cuntanschì il mez final.
Ils auters èn giuvens ed han ambiziuns
El possia dir ch’el saja il vegl dals mezfinalists e quai na saja betg in dischavantatg, di Fatmir Spescha. Ils auters cuschiniers vulan nizzegiar la qualificaziun per far in pass ensi sin la scala da carriera, per el muntia la qualificaziun ina schanza da mussar sias abilitads, ma per sia vita na midia quai nagut, declera l’um che maina la cuschina en la chasa da tgira. El saja perquai era liber da squitsch. Avant 20 onns avessi el forsa era pensà auter, ma uss saja quai sulet ina satisfacziun da vesair, bain nus essan sin la dretga via cun nossa cuschina, di Fatmir Spescha.
Menu regiunalisà
Tut las participantas e participants han giu d'inoltrar lur proposta per in menu. Dà avant era da cuschinar cun tartuffels, charn-portg svizra e litgiva svizra, tge far ha mintgin pudì eleger. El haja vulì regiunalisar ses menu ed ha perquai proponì da cuschinar maluns, ma maluns a moda da gourmet, di Fatmir Spescha. E sia proposta ha persvas la giuria e perquai stat el cun 8 auters cuschiniers en il mezfinal. Quel ha alura lieu ils 7 d’october a Baden. Per cuntanscher il final sto el batter sulettamain trais, perquai ch'ils megliers tschintg mezfinalists cuschinan alura en il final ch’ha lieu il favrer da l’onn proxim. Ma era sch’el gudogna la concurrenza, Fatmir Spescha vegn a star fidaivel a ses patrun da lavur. Els sajan gia vi da ponderar d'avrir en l’avegnir l’ustaria da la Puntrais era la saira, per alura propi era pudair porscher menus da gourmet, ma quai na saja anc betg decis, ma sin buna via, ha era il mainachasa Gian-Reto Nufer confermà. Per lez èsi ina gronda onur d’astgar avair in collavuratur talmain engaschà, ma la lavur quotidiana stoppia cuntinuar e la concurrenza saja en il temp liber. Ma da gliez èn tuts persvas che Fatmir Spescha na vegn betg a negliger sia lavur quotidiana, perquai che sia fermezza è gist quai, el na lai betg bittar or da ses concept e perquai èn las schanzas intactas da propi daventar «der Goldene Koch».
