Ils indriz tecnics d'ina pendiculara ston adina puspè vegnir controllads e mantegnids. Quellas lavurs vegnan fatgas suenter mintga stagiun. Ina revisun cumpletta d'ina pendiculara sco quella che va sin il Crap Masegn è dentant ina pli gronda chaussa e schabegia mintga 50 fin 70 onns. Uschia ston las sugas veglias vegnir demontadas e las novas puspè vegnir stendidas sin l'indriz tecnic da la pendiculara. Gia da transportar il material da montascha e la suga sezza è stà ina sfida.
Las sugas novas or d'atschal che paisan varga 40 tonnas, han stuì vegnir transportadas cun in camiun spezial sin il Crap S. Gion. L'equipa da la firma spezialisada sin la construcziun da pendicularas è ussa vid rullar giu cun in sistem da turns las sugas veglias. Igl è impurtant che las sugas vegnan rulladas senza stratgas e ch'ils turns pon pigliar si las forzas enormas. Il moviment da la suga sto adina esser sut controlla, ella na dastga mai pender atras. Sch'ella croda giu sin tiara pudess ella uschia blessar insatgi. La lavur n'è betg senza privel.
Las difficultads giaschan tar las grondas forzas ch'èn en la suga. Nus stuain segirar giu tut per che nagut po schabegiar.
Las sugas veglias vegnan tagliadas mintga 100 meters ed lura rulladas sin rollas, per ch'il transport engiu saja pli simpel. Ina giada demontà l'indriz vegl, va la lavur vinavant cun la montascha da las novas sugas, quai en direcziun cuntraria . A la fin vegnan mo pli las pendicularas e las pitgas da l'indriz oriund a star en funcziun.
Las lavurs cuzzan fin l'entschatta october sche tut va suenter plan. Davent da la proxima stagiun d'enviern pon las pendicularas dal Crap Masegn lura ir sin sugas ch'avessan puspè da tegnair in mez tschientaner.
