Gian Clalüna da Segl sa regorda anc bain vid il di grondius, cura che la pendiculara Furtschellas è vegnida inaugurada. El aveva 13 onns e da pudair ir cun la pendiculara si Furtschellas saja stà grondius.
Tuttenina era tut uschè grond. Da vesair l’Engiadina da surengiu è stà in mument spezial.
Ovomaltina gratuita
Tar la staziun da muntogna hai gia quella giada dà in pitschen restaurant, «ina baracca» sco Gian Clalüna di. La patruna aveva repartì Ovomaltinas chaudas a las skiunzas ed ils skiunzs. Quai restia spezialmain en regurdanza. Numnadamain hajan el e ses fragliuns pudì ir cun skis, per ina bavronda na bastavan ils raps però betg.
Grond svilup
Il territori da skis saja stà simpel: dus runals, las pistas vegnivan fatgas cun ir culs skis. Pass per pass saja il territori da skis creschì. Las pistas èn vegnidas fatgas cun maschinas, las emprimas sutgeras èn vegnidas installadas ed er il material da skis è sa sviluppà fitg en tut quels onns. Gian Clalüna giauda er oz anc las pistas da Furtschellas – betg pli uschè savens e betg pli cun skis da lain, mabain cun tut las bellas regurdientschas d’avant 50 onns.
