450 burras da lain èn idas tras la resgia a Trun. Or da quellas datti quaders da passa tschintg meters. Quels fan lura part da la construcziun purtanta dal plantschieu sura per la nova scola auta FHGR a Cuira. En tut dovra quai 5'500 quaders. Otg resgias en l'entir chantun elavuran la laina che 34 vischnancas han pinà en ils guads grischuns. Part da quest project fa era la Tarcisi Maissen SA a Trun.
Igl è ina grond'onur da far questa lavur. Noss avantatg è che nus pudain resgiar ed era sientar la laina en noss manaschi.
Suenter resgiar vegn la laina a Trun sientada en l'aria. Alura vegn ella setgentada en in furn e splanada. Pli tard vegn la laina transportada en in deposit a Landquart.
Toc a toc vegn alura duvrà per la construcziun dal plantschiu sura. Per lavurs da fatschada ston ins percunter cumprar vitiers per part er laina da l'exteriur, perquai che la planisaziun na saja anc betg stada uschè lunsch ch'ins ha pudì applitgar er là lenna dal Grischun.
La sfida è stada da savair gia en la fasa da planisaziun, tge laina ch'i dovra exact. Uschia avain nus pudì empustar baud avunda la laina indigena.
Per il chantun è quai l'emprima giada ch'i dat ina collavuraziun da questa dimensiun sur l'entir chantun ora. La gronda sfida era d'empustar la massa da laina avant che la planisaziun per il nov edizifi è insumma stada a fin. Las lavurs sajan succedidas fin uss tenor l'urari. L'edifizi vess d'esser a fin dal 2028.
