Ils da Sumvitg han approvà cun gronda maioritad da 302 vuschs Gea cunter 57 vuschs Na il credit per realisar ina saiv da protecziun per il guaud da Puzzastg sur il vischinadi da Surrein. Il guaud che duai proteger da bovas, lavinas ed autras forzas da la natira na vegn betg pli da sa regiuvinar. La saiv saja necessaria per che la selvaschina d'ungla na vegnia betg pli vitiers e donnegia las frastgas dals pigns e las plantas. Cun il Gea po vegnir realisada enfin la fin d'avust 2026 ina saiv da 2,8 kilometers lunghezza ch'è 2,5 meters auta. En tut custa il project 1,44 milliuns francs. Da quels vegn l’Uffizi chantunal da guaud e privels da la natira a pajar la gronda part, probablamain 90%, quai tenor indicaziuns da la vischnanca.
Impurtanta funcziun da protecziun
Il guaud da Puzzastg sur il vischinadi da Surrein en la vischnanca da Sumvitg ha ina impurtanta funcziun da protecziun. Per ademplir quella dovri ina regiuvinaziun natirala dal guaud. Quella n’è dentant gia dapi blers onns betg pli dada. Cun pliras mesiras han ins vulì far frunt al problem, uschia per exempel cun intensivar la chatscha en questa part dal guaud. Success n'hai betg propi dà, uschia ch’ins ha uss decis ina mesira unica en il chantun Grischun e probablamain era en Svizra: trair ina saiv enturn l’entir guaud che dovra urgentamain ina regiuvinaziun.
Saiv da 2,5 meters autezza
La saiv da protecziun vegn sin ina distanza da 2,8 kilometers ed ella vegn ad avair ina autezza da 2,5 meters. La finamira è che tut la selvaschina d’ungla vegn sclausa da quest areal, per uschia evitar ch’ella morda las frastgas fadetgnas dals pigns, han declerà ils responsabels. Las lavurs duajan vegnir fatgas d’ina interpresa privata, ha ditg il selvicultur communal Beat Cadruvi. La gronda sfida è tranter auter il terren fitg stip, per l’autra era che las experientschas da realisar in tal project mancan. Ma quai saja era ina bella sfida da pudair realisar in project unic nua che segir er autras vischnancas vegnian a pudair profitar da las experientschas, uschia Beat Cadruvi. La saiv vegn construida per 40 onns per gronda part cun pitgas da metal e suenter quest temp duai lura tut vegnir refatg e la funcziun da protecziun surlaschada al guaud. Il guaud saja anc adina la meglra mesira da protecziun cunter lavinas, sbuvaditschs ed auters privels da la natira, uschia il selvicultur.
