Sche Theo Schaub va tras il plazzal da la chasa Arpagaus en la Städtlistrasse 17 da la citad veglia da Glion, discurra el da materials e sco quels vegnan elavurads. Cun ina lingua precisa ed in ritmus constant declera el las lavurs che procuran che la valur istorica dal bajetg vegn mantegnida. Restauraturs, picturs e lainaris èn vi da la lavur. En il bajetg dal 17avel tschientaner lascha l'investitur bainprest a fit las localitads per la biblioteca communala. L'atun èsi uschè lunsch.
Quai è la «stiva sursilvana», in lieu che vegn tavlegià cumplettamain cun lain da schember e nua ch'i dat mo litteratura sursilvana.
Per quest intent survegn la chasa Arpagaus in nov vestgì cun resguard sin ina moda da construir ch'è cumpatibla cun l'Istorgia dal bajetg. Tar da quels projects lavurian els stretg ensemen cun la tgira da monuments, manegia Theo Schaub.
Grond possess d'immobiglias
En ils davos onns han Theo Schaub e la Schaub Immobilien AG cumprà pliras immobiglias en il «Städtli» da Glion. Uschia èn els possessurs dals bajetgs dumber 1, 2 ,3, 4, 5, 17, 18, 25 en la Städtlistrasse, sco era dal dumber 8 en la Rathausgasse. Radund in terz dals bajetgs da la Städtlistrasse èn entant en ils mauns da l'investur. Ils blers objects ha Theo Schaub renovà ed alura laschà a fit ad ustarias e negozis. Concret èn quai l'ustaria Obertor, la Städtlibeiz, la stizun La Trucca, la stizun da fluras Calamandrin ed il nov spazi da lavur, il Coworking 7130.
La difficultad èsi, da pudair dar vita al plaunterren en la citad veglia.
Tge è la motivaziun da cumprar da quels objects vegls? Questas immobiglias sajan pli interessantas che bajetgs novs perquai ch'i dovria in bun concept sco ch'ins possia utilisar els en l'avegnir, manegia Theo Schaub. Ed er ord vista finanziala rendian quests bajetgs istorics: Cumpareglià cun bajetgs da pliras famiglias or dals onns 1940/1950 en la citad da Turitg, saja la substanza architectonica in bun toc meglra.
Tut quellas immobiglias eran in pli lung temp sin il martgà. Nagin n'aveva in'idea tge far, ed era betg il curaschi da far insatge cun ellas.
Las ustarias, stizuns, abitaziuns ed auters spazis lascha Theo Schaub a fit per in pretsch moderà, sco el di. I saja meglier d'aviar affittaders che stettian ditg, perquai ch'i rendia da betg adina puspè avair midadas. Cun las renovaziuns per la biblioteca communala n'èn betg tut ils projects da Theo Schaub en il «Städtli» terminads. La stizun en la Städtlistrasse 3 duai vegnir renovada ed en l'uigl sper il spazi da coworking, duai dar ina stanza per funcziuns multiplas cun tranter auter ina pitschna gastronomia.
Theo Schaub ha cumprà l'ustaria Mundaun a Castrisch
Jolanda Cabalzar e Reto Schildknecht mainan dapi passa 20 onns l'ustaria Mundaun a Castrisch. Quest atun chalan els cun il manaschi. I va dentant vinavant cun l'ustaria. L'investitur Theo Schaub ha cumprà il bajetg da l'onn 1873 cun ustaria e pliras chombras. Quai ha el communitgà uschia a las medias.
Il potenzial ch'ina ustaria po vinavant exister là, è avant maun.
Tenor Theo Schaub haja la suletta ustaria tranter Castrisch è Valendau potenzial sco lieu d'inscunter per la populaziun e sco lieu culinaric per il turissem dal di. L'ustaria renovada duai avrir las portas en il decurs da l'onn proxim.
Or da l'archiv:
