Grischun dal nord - Privel da lavinas sa reducescha sin considerabel

Situaziun da l'aura, naiv e lavinas

Avrir la box Serrar la box

• Sin  rtr.ch/aura/naiv  datti l'entira survista cun il privel actual l'autezza e la previsiun

• Qua vai tar  la prognosa da l'aura  sin rtr.ch

Ils ultims dis hai naivì e quai en tut la Svizra. En differents lieus ha la naiv fatg fastidis ad automobilistas ed automobilists. Cun la naiv è er il privel da lavinas s'augmentà. L'institut da naiv e lavinas SLF aveva la damaun dals 24 da december annunzià per il Grischun dal nord in grond privel da lavinas, stglim 4. Quai è dentant puspè sa midà - sin stgalim 3 considerabel, sco er en las bleras parts dal chantun. Sulet en las valladas dal sid e la Val Müstair è il privel moderà sin stgalim 2.

Er en ils chantuns Glaruna, Uri e Vallais è il stgalim sa reducì sin il stgalim 3. Tenor SRF Meteo haja dà en la part centrala da las Alps enfin dus meters.

Situaziun sin las vias

Suenter ch'i ha dà disturbis ils ultims dis sin las vias grischunas è la situaziun da traffic sa calmada. Actualmain vala:

• Serrads ord raschuns da segirezza èn ils pass dal Flüela e dal Lucmagn.
• Ils ulteriurs pass grischuns sco er la gronda part da las vias en las valladas èn cuvertas cun naiv .

Er transport sin binaris è pertutgà

Sin la lingia da viafier Andermatt-Mustér pudevan ils trens charrar mardi marvegl be cun restricziuns. Il motiv eran il privel da lavinas ed era in tren ch’ha bloccà il traject. Pervi da la blera naiv era ina cumposiziun da trais parts sa fitgada glindesdi en in sviader a Tschamut. Pervia da la blera naiv è il traject Andermatt-Dieni era stà interrut il mardi. Tranter Dieni e Mustér percunter curseschan ils trens, ha ditg in pledader da la Viafier Matterhorn-Gotthard sin dumonda da l’agentura da novitads Keystone-SDA.