L'Arena Alva ha gì in bun onn da gestiun cun ina svieuta netto da 89,5 milliuns francs. Quai è 1,4 milliuns dapli che durant l’onn da gestiun passa.
65'000 pernottaziuns durant la stad 2020
La stagiun turistica da stad saja stada ina sco la destinaziun haja anc mai vis, scriva Markus Wolf, il schef da la Gruppa Arena Alva. Cun 172’153 emprimas entradas (onn avant: 127’793) e 64’954 (39’579) hajan els pudì augmentà las cifras marcantamain vers la stad da record 2019. Era las abitaziuns da vacanzas èn stadas tschercadas: Il Rocksresort ha nudà 46’000 pernottaziuns.
Minus da 7 milliuns tranter Nadal e Bumaun
L’enviern ha cumenzà plitost mal. Si en ils auts ha la naiv mancà e pervia da corona sajan las reglas vegnidas midadas adina puspè. La consequenza è in minus da ca. set milliuns francs tranter Nadal e Bumaun. Alura èsi dentant ì meglier cun la bell’aura dal favrer. La fin dal mais èn las terrassas vegnidas serradas. Ma la stagiun d’enviern saja stada andanta, concluda Wolf. La Gruppa Arena Alva ha gì 981’041 emprimas entradas (enviern avant: 874’386). Il gudogn avant deducziuns da l’onn da gestiun 20/21 è 23,6 milliuns francs.
