Agrischa a Glion - La pli gronda exposiziun d’agricultura grischuna è pronta

Il comité d’organisaziun che sa cumpona da 20 persunas ha prestà blera lavur per pudair organisar la pli gronda exposiziun d’agricultura en il Grischun. Er la decisiun da spustar l’exposiziun per in onn saja stada la dretga, di Curdin Capeder, president dal comité d’organisaziun. Perquai che las annunzias da vegnir e da sa mussar en il til u d’ina autra vart èn vegnidas tut a dubel e mussian che la populaziun haja gust da s’entupar.

Blers animals e la preschentaziun da las tratgas da vatgas

In dals puncts culminants è l’exposiziun da radund 200 vatgas da latg che vegnan er premiadas quella fin d’emna, di Curdin Capeder. Ma er blers auters animals vegnan mussads, da razzas da vatgas main enconuschentas sur animals pli pitschens sco chauras e nursas. Ed er ils chavals èn preschents, è vegnì orientà dal comité d’organisaziun. In novum è er ch’ina muntanera cun chauns da protecziun vegn mussada. Quai duai promover la discussiun en connex cun il luf e las sfidas da tegnair chauns da protecziun, di Curdin Capeder. Els veglian la discussiun e surtut chattar il dialog.

Chantun Uri sco giast a l’Agrischa 2023

Per l’emprima giada insumma vegn in giast ad esser preschent a l’exposiziun grischuna. Uschia è il chantun Uri vegnì envidà dal comité d’organisaziun. Els vegnian ad esser preschents cun musica e culinarica ma surtut er durant il til, accentuescha Andreas Cadonau, responsabel per las attracziuns. Il til che furma il punct culminant da la dumengia vegnan ils vischins a timunar, per l’ina cun la charrotscha da posta dal Gottard ed il Guglielm Tell, ma er cun uniuns ed animals nà da l'Uri, di Andreas Cadonau.

La sfida da traffic

Las convischinas da la citad da Glion ston quintar la fin d’emna dals 29 e 30 d’avrigl cun blers impediments da traffic. Impurtant saja il dialog, perquai hajan els scrit a tuttas abitantas ed abitants in brev e supplitgà per chapientscha, declera il president dal comité d’organisaziun. Ina sfida vegnia er ad esser da vegnir e tgirar tut ils animals al lieu. Sin il bainstar da quels vegn numnadamain mess gronda paisa, accentueschan ils organisaturs. Ma er sin il bainstar da las visitadras ed ils visitaders, uschia dettia surtut da vesair bler per famiglias e speranza per tuts, accentuescha Curdin Capeder. Ed in giavisch han ils responsabels da l’Agrischa 2023 a Glion, numnadamain ch’i dat sulegl.

Or da l'archiv

La davosa giada a Glion ha l'Agrischa gì lieu il 2016, quai per la segunda giada insumma.