Il Sursilvan da 49 onns era vegnì elegì il november 2020 ed entrà en uffizi il zercladur da l'onn passà. Ses post dat el giu sin la fin da favrer 2023. A partir dal 1. d’avrigl 2023 surpiglia el il post sco mainafatschenta da la Crusch Cotschna Svizra dal chantun Grischun. Quai han tant la Lia Rumantscha sco la Crusch Cotschna Svizra dal Grischun communitgà la gievgia.
Return en il sectur social e da sanadad
Cun la midada tar la Crusch Cotschna turna Diego Deplazes enavos en il sectur social e da sanadad. Avant ch'el ha surpiglià il post sco secretari general da la Lia Rumantscha è el numnadamain stà plirs onns manader da fatschenta dal Center da sanadad Puntreis a Mustér. Anc avant ha el manà la curatella professiunala da la Surselva e dà scola sin plirs stgalims.
Tut en tut haja el lavurà avant che vegnir tar la Lia durant 17 onns sin divers champs en quest sectur. La plazza scritta ora tar la Crusch Cotschna haja plidentà el ed el è persvas da pudair contribuir cun sia savida e sviluppar vinavant l'organisaziun grazia a quellas experientschas professiunalas.
Jau hai segir laschà encrescher per il sectur social e da la sanadad. Quai èn temas che stattan a mai fitg a cor.
I n'è betg stà ina decisiun cunter il post dal secretari general, agiunta l'um da 49 onns. Quai saja in post fitg interessant. Però plitost ina decisiun per returnar en il sectur social e da sanadad. Diego Deplazes è da l'avis che la Lia Rumantscha saja sin buna via. Per exempel sin il champ da la digitalisaziun cun in program d'ortografia per ils differents idioms ch'è en lavur, divers projects per la promoziun dal rumantsch en la Bassa che sajan stads visibels en medias regiunalas e naziunalas u er projects per la scola populara che hajan gì in bun dumber da participants e participantas.
Co-presidentas deploreschan la decisiun
Il duo, Gianna Luzio ed Urezza Famos han surpiglià il presidi da la Lia Rumantscha il cumenzament da quest onn. Omaduas laudan la collavuraziun cun Diego Deplazes e deploreschan ch’el banduna la Lia. El haja sco secretari general fatg gronda lavur cun rinforzar las structuras operativas. Uschia haja el mess ina basa preziusa per sviluppar vinavant la Lia Rumantscha.
Avant che la plazza sco secretari ni secretaria generala vegn scritta ora, stoppian ins uss seser ensemen e concretisar il profil per la nova persuna. Nus lain uss era pigliar il temp ch'i dovra per decider, di Urezza Famos.
Nus essan avertas per tut ils profils che vegnan a tschertgar il contact cun nus.
La finamira è da cuntinuar sut ses successur u sia successura cun la strategia instradada ils ultims onns. Quella han delegadas e delegads approvà l'october 2021. La nova strategia metta tranter auter accents sin il nizzegiar ils avantatgs da la transfurmaziun digitala, il svilup da novas purschidas da furmaziun e la promoziun dal rumantsch ordaifer il territori da tschep, sco p. ex. cun purschidas en la Bassa.
Or da l'archiv
