In nov studi mussa che 72% dals hotels e 58% da las abitaziuns turisticas stgaudan cun carburants fossils. Cun ina meglra isolaziun possian ins reducir quai sin in quart enfin in settavel dals basegns.
In'ulteriur problem sajan abitaziuns secundaras vidas che vegnan stgaudadas l'entir onn. Quai sajan 85% da tut las abitaziuns secundaras en il Grischun. Er qua possian ins spargnar marcantamain cun manischar ils stgaudaments or da distanza. I dettia tenor il studi 50% enfin 80% potenzial da reducir emissiuns.
Betg avunda per cuntanscher netto nulla
Fatgs è il studi vegnì fatg dal Forum economic dal Grischun, in laboratori d'ideas u uschenumnà «thinktank». Tenor ina communicaziun a las medias mussia il studi ch'il turissem contribueschia substanzialmain a las emissiuns da CO2 grischunas. Cun mesiras precisas vegnia ad esser pussaivel d'evitar ina gronda part da las emissiuns per cuntanscher netto nulla enfin 2050 .
Cunzunt pervia da la moda da viagiar da turistas e turists na vegnia quai dentant betg a tanscher. 90% da las emissiuns dals viadis da las persunas resultan ordaifer dal chantun. E sch'ins quintassia er las emissiuns ch'il turissem grischun ha da render quint per raubas che vegnan importadads e producidas en l'exteriur, fissan las emissiuns totalas anc ina giada 40% pli autas (uschenumnada energia grischa).
