Las segundas dosas per las persunas schon vaccinadas sajan garantidas. La stretga tar la furniziun ha consequenzas per ils centers decentrals da vaccinaziun e da test. Uschia survegn il center da vaccinaziun a Cuira (Ospital da la Crusch) uss – sper il vaccin da Pfizer/Biontech – er il vaccin dal concern moderna. Quellas dosas manchian lura dentant per ils ulteriurs centers regiunals. Quai chaschunia ulteriurs retards tar ils termins da vaccinaziun.
Vaccinaziun a partir da la fin da schaner
Tenor la media chantunala, Marina Jamnicki, hajan ins schon quintà cun uschia situaziuns. Quasi mintga di dettia midadas vid il plan da vaccinar dal chantun.
Vaccinar la populaziun è in maraton, nagin sprint.
Tenor il stan dad oz duain ils centers avrir ils 25 da schaner. Ils centers sa chattan a Glion, Scuol, San Murezzan, Cuira, Puschlav, Schiers, Tusaun e Tavau. Ina annunzia è obligatorica. Perquai ch'i dat il mument relativ pauc vaccin, è il focus principal dal chantun sin persunas sur 75 onns e sin persunas creschidas cun grevas malsognas cronicas.
