Stima da donns en Mesolcina - «Jau fatsch mes job … e quai ma tutga fermamain» – Renzo Lisi

La glista da las chasas nua ch’ils donns ston vegnir stimads è lunga. Renzo Lisi da l’Assicuranza d’edifizis dal Grischun cumenza baud cun sia lavur en la Mesolcina. L’emprim cas è in magasin datiers al guaud a Grono, ch’è vegnì tutgà fermamain d’ina bova. Ina paraid dal bajetg da lain è rutta en, e material è culà en il magasin. Enturn il bajetg èn mantuns da dus enfin trais meters crappa, laina e belma. Renzo Lisi sa lascha declarar la situaziun dal client – e fa suenter fotografias dal bajetg e lascha sgular la drona per survegnir ina survista. Sia lavur è da prender si ils donns e suenter stimar quels.

In auter cas è a Lostallo: in grotto, in pitschen restaurant, directamain sper la bova. Il proprietari Luigi Fossati di ch'i saja era fortuna ch'il grotto sez na saja betg tutgà. Sulet l'iert enturn è cuvrì cun var in meter belma.

Visavi dal grotto, da l’autra vart da la bova, stat ina chasa ch’è vegnida tutgada fermamain. L'iert e l’abitaziun èn plain belma e crappa. En las stanzas chamin'ins tras intgins centimeters aua. Vi da las paraids èn da vesair sin in’autezza da var 50 centimeters ils fastizs da l’aua e da la belma. Il furnin e la frestgera eran era plain belma. Luca Decristophoris gida a ses confamigliars cun la chasa. El di che blers sajan vegnids a gidar – e tuttina dovria anc mais u onns enfin che tut ils problems sajan schliads. Durant la ferma plievgia il venderdi saira era il fittadin a chasa ed ha pensà ch'insatgi spluntia a la porta. El haja avert ella – e vegnì en sajan belma e laina, di Luca Decristophoris. Tras la forza da l’aua na pudeva el betg pli serrar la porta, ed ha stuì scappar da la fanestra ora.