Il 2023 hai dà 1'139 delicts en il sectur da la criminalitad digitala. Quai èn dapli che dubel uschè bler che l'onn 2022 (516 cas). Quai saja ina raschun ch'il dumber da cas saja creschì per 23% en total l'onn passà, scriva la Polizia chantunala en ina communicaziun a las medias.
L'autra raschun sajan delicts da facultad. Igl ha dà 318 dapli enguladitschs il 2022 che durant l'onn 2022 (2'772 en tut). Cunzunt dà en egl a la polizia èn ils enguladitschs en butias (500 cas, +59%) ed ils enguladitschs d'e-bikes (464, +109%) e velos (553, +34%).
E-bikes e velos èn magari simpel d'engular e vender.
Ed er engions datti dapli, quai cunzunt a moda digitala. Engions muntan a 55% dals delicts da criminalitad digitala. A la testa sajan cunzunt engions sin plattafurmas d'inserats pitschens.
La davosa giada hai dà avant 10 onns in cumparegliabel dumber da delicts da facultad. Dentant è il dumber da cas sclerids cun 40% marcantamain pli aut il 2023 che l'onn 2013 (20%).
Dapli cas en Svizra
En Svizra hai dà dapli delicts l'onn passà. Cun passa 522'000 cas criminals è il dumber creschì per 14% cumpareglià cun l'onn avant, quai mussan las novas cifras da l'Uffizi federal da statistica.
Surtut tar ils delicts da facultad èsi vegni constatà in ulteriur augment suenter l'onn avant. Quai cun in plus da passa 17%. Tar ils enguladitschs or da vehichels èsi schizunt vegnì nudà in plus da passa 70% sin passa 18'000 cas, in nov dumber da record. E sco gia l'onn avant hai er il 2023 dà dapli delicts criminals digitals (+31%) sco er grevs delicts da violenza (+6%).
Regiun Cuira pertutgada
65% da tut ils delicts en il Grischun èn delicts cunter la facultad. Il lieu dals delicts è cunzunt la regiun Cuira, 45% da tuts ils delicts èn capità là. Cuntravenziuns cunter la lescha penala (delicts da facultad, violenza eav.) èn cunzunt vegnidas fatgas da persunas ch'abiteschan permanentamain en Svizra.
Cocain sa derasa
Tar il consum sco er tar il commerzi n'è betg bler sa midà. I dat dentant dapli cas en connex cun cocain, quai saja pervia da la «gronda disponibladad ed als pretschs bass» e possia vegnir «observà tant sin plaun internaziunal sco er naziunal». 2,19 kilos ha la polizia chantunala confiscà il 2023, passa trais giadas dapli che anc il 2022.
Il privel che dapli persunas vegnan en contact cun cocain è adina pli aut.
461 dals total 1'185 malfatgs cunter la lescha da meds narcotisantas èn vegnids fatgs a Cuira, 327 en Engiadina e 284 en la regiun Rain Moesa. Ils pli blers cas èn sco en auters onns en connex cun chonv.
