En tut ils territoris dumandads èn ils responsabels e las responablas cuntentas cun la situaziun. Tuttina datti intginas differenzas regiunalas. Entant che l'Arena da skis Andermatt-Sedrun ha cunzunt bunas cundiziuns da la vart dad Andermatt ed in pau main bunas da la vart da Sedrun, ha p. ex. il territori da cunfin a Samignun cun passa 70 cm naiv, tanta naiv sco gia dapi onns betg pli. Betg extraordinari buna saja la situaziun a Savognin, ma definitivamain bler meglra che l'onn passà ed i haja ina fitg buna basa per quest temp.
Situaziun da naiv fa paucs fin nagins quitads
Betg pudì avrir sco planisà las pistas sin il glatscher dal Vorab, ha l'Arena Alva. Quai però betg perquai ch'i n'avess betg avunda naiv. Mabain pervi dal vent che ha buffà uschè ferm ch'igl ha suflà davent blera naiv e che n'ha betg lubì da laschar cursar las cabinas.
Tut ils responsabels e las responsablas conferman però er: Malgrà la buna basa entras la naiv natirala ch'i ha gia dà quest onn, na fissi strusch pussaivel d'avrir gia uss parts dal territori senza naiv tecnica. En divers territoris han ins gia pudì producir bain naiv tecnica. E tuttas e tuts quintan uss cun las temperaturas pli fraidas, annunziadas per il proxim temp, da pudair producir anc dapli naiv.
Sch'ins guarda uss èsi dapertut alv ed avant in onn eri dapertut verd auter che quels pèr stritgs alvs ch'ins ha pudì ennavar. Da quai or en quai munds differenza. Uss èsi puspè enviern.
Plievgia n'ha betg fatg bain ma n'è nagina catastrofa
Nagin dals territoris ha stuì spustar u midar dal tuttafatg plan pervi da la plievgia da l'ultim temp. Quai er sche quella è per part rivada fin sur 2'500 m s. m. Bain haja ella fatg in pau donns ed uschia en tscherts lieus fatg in stritg tras il quint quai che pertutga l'avertura da las pistas a val, ma propi mess sil tgau n'ha ella nagins plans. Er na saja la plievgia betg uschè in grond problem sch'i haja gia ina buna basa da naiv sco er pli aut ch'il territori giaschia.
Suenter ils ultims trais onns che n'èn stads betg in enviern normal, cun Covid e lura la mancanza d'energia... E da quai ora sa legrain e sperain nus uss propi ina giada sin in enviern «normal» cun naiv e cun bun'aura. E quai è natiralmain schon bel.
Avunda persunal e buna prevendita
Anc avant in onn eri ina gronda sfida per ils territoris da skis da chattar avunda glieud che lavura sin pista ed en la gastronomia. Ina sfida, saja quai anc adina, conferman tuttas e tuts dumandads. Però sa preschenta la situaziun gia bler meglra, gea per part schizunt fitg buna. En l'Arena da skis Andermatt-Sedrun hajan ins pudì occupar fin mez november 97% da tut las plazzas, uschia Ignaz Zopp. Quai saja uschè legraivel sco dapi onns betg pli.
Er auters territoris sco p. ex. Tavau-Claustra u Corvatsch-Diavolezza han chattà avunda persunal. Però menziuna Nicolà Michael dal territori Corvatsch-Diavolezza anc in'ulteriura sfida. Bunamain anc pli cumplitgà che chattar la glieud, saja da chattar abitaziuns per tuttas e tuts. Ma er qua sajan els sin buna via.
Tant a Tavau-Claustra sco er a Sedrun-Andermatt hajan ils emprims dis cun pistas avertas, purtà buns resuns e blera glieud en ils territoris. Ed en l'Arena Alva è la responsabla cuntenta cun la prevendita. Tschertas cartas ed abunaments sajan sin il medem nivel sco l'onn passà autras schizunt fin 20% surora. Quai mussa tenor Elian Bernasocchi-Volken che la glieud haja gust e veglia puspè ir sin pista. Er ils hotels sajan gia occupads bain, sulettamain en il december dettia anc potenzial. Ma quai saja normal, cunquai che blera glieud guardia en in prim pass tge purschida ch'i dettia en il territori e decidia lura a curta vista da vegnir u betg il december.