Il forum da las Pendicularas svizras, ha gì lieu quest onn a Tavau sut l’ensaina da la persistenza. In discurs cun represchentantas e represchentants da la branscha mussa dentant che betg mo la persistenza è ina sfida. Sper la midada da clima fatschenta era la situaziun d’energia, la chareschia, la mancanza da persunal sco era las regulaziuns da construcziun.
Il squitsch da regulaziuns va mo en ina direcziun, las cundiziuns vegnan adina pli severas.
Fruntar las sfidas cun optimissem
Las pendicularas sajan da principi resilientas, sco che tranter auter la pandemia ha mussà, di Berno Stoffel, il directur da la l’Uniun da pendicularas svizras. Ed ins saja cunzunt tar las pendicularas conscient da la responsabladad envers la natira e sias resursas, agiunscha Andri Schmellentin da las pendicularas Grüsch-Danusa.
Nus savain quanta valur che la natira ha per nus.
Las sfidas èn evidentas, la tenuta dentant optimistica. En il futur vala dentant da midar la strategia da communicaziun, conferman ils represchentants da las diversas pendicularas. Far insatge bun e discurrer da quai. E sperar sin naiv, quella è numnadamain la soluziun per las bleras sfidas.