Investiziuns, renovaziuns ed ennavar pli intensiv dovra energia ch' è daventada pli chara, quai resulta en custs da gestiun pli e pli gronds per ils territoris da skis. Quests custs supplementars vegnan adossads per part als giasts, en furma da pretschs d'entrada pli auts. Adina dapli territoris da skis fan diever er da pretschs dinamics che difficulteschan da cumparegliar ils pretschs per ils giasts.
Pretschs dinamics varieschan tut tenor il mument da cudeschaziun e pon esser dependents da la stagiun, l'occupaziun e da l'aura. Ils giasts che cudescheschan baud profitan uschia da pretschs d' entrada pli favuraivels, entant che skiunzas e snowboardists spontans ston dar ora dapli daners.
Ils augments concrets dals pretschs sa preschentan sco suonda:
- Motta Naluns, Scuol: Nagin augment da pretschs per abunaments da stagiun, Cartas da di nov 69 francs empè da 62 francs. Vendita online cun pretschs dinamics.
- Engadin St.Moritz Mountains: Nagin augment da pretschs per abunaments da stagiun. Pretschs dinamics per 3% pli char.
- Telefericas Savognin: Abunaments da stagiun 3% pli chars. Pretschs dinamics a partir da questa stagiun.
- Telefericas Obersaxen/Mundaun: Augment da pretschs general da 3.4%
- Andermatt, Sedrun, Mustér: Nagin augment da pretschs per cartas dal di. Abunaments da stagiun, tenor mument da la cumpra, fin 12% pli chars
- Weisse Arena Laax: Carta dal di 59 francs empè da 55 francs
- Arosa/Lenzerheide: Cartas dal di fin 6% pli char
- Topcard, abunamaint da stagiun per Tavo/Klostra, Arosa/Lenzerheide e Laax: 100.- francs pli char