Durant ils dis d'enviern èsi fraid, umid e bletsch. Plaschair vi da questas circumstanzas ha surtut il bulieu da miffa. Per el è quai la chaschun perfetga da sa derasar en las chasas ed en las abitaziuns. El è surtut da chattar en il bogn tranter las plattas, davos las mobiglias, vi dal lain u vi da las paraids alvas. Dapertut nua ch'igl è fraid ed umid, crescha el en furma da flatgs verds, grischs ed oranschs.
La miffa crescha. Ed uss? Joshua Verhoeven, il president da l'associaziun da locataris dal Grischun, declera tge ch'ins sto far en ina tala situaziun.
La meglra via è, sch’ins infurmescha directamain il locatur u la locatura. Quai è fitg impurtant perquai che la miffa po er periclitar la sanadad.
Uschespert che la locatura u il locatur è infurmà, èn quels obligads da reagir e d'instradar mesiras. Ma avant ch'il bulieu vegn allontanà, ston ins chattar ora daco ch'igl è insumma vegnì uschè lunsch. I po esser che la chasa n'è betg isolada bain u ch'il tetg n'è betg resistent a l'aua. Las raschuns per il bulieu da miffa pon esser fitg differentas, sco il president di.
E sche la locatura u il locatur na respunda betg?
Per il cas ch'ils responsabels na reageschan betg sin l'annunzia, recumonda Joshua Verhoeven da trametter a quels ina brev scritta en. E sche era quai na gida nagut, alura pon ins contactar l’associaziun da locataris. En il mender cas pon ins far in termin tar il post da mediaziun dal chantun. Il president cusseglia dentant, da pir far quai cura ch'i dat dispitas u discordias tranter las partidas. Pia sch'i na dat naginas autras pussaivladads pli.
I n’è betg adina simpel da chattar or tgi che porta la culpa vi da la miffa. Il sbagl po esser vi da la construcziun da l’edifizi, ma er vi dal stil da viver da l’abitanta u da l’abitant.
Joshua Verhoeven cusseglia da mintga di dar aria currenta, da metter en funcziun la ventilaziun durant cuschinar e da betg metter mobiglias vi da paraids fraidas. Independent da la dumonda da la culpa, sto la miffa vegnir eliminada uschè svelt sco pussaivel per evitar ulteriurs donns.
Tips e trics
Il pli impurtant factur gioga l'aria en l'abitaziun. Qua datti differentas chaussas ch'ins sa far a moda preventiva. En general duai la umiditad da l'aria esser tranter 30% e 50%. Davent da 50% ensi vala l'aria sco umida.
- Suenter ch'ins ha cuschinà e fatg la duscha vegn cusseglià d'avrir las fanestrar per in mument, e tut tenor sientar giu las plattas bletschas en bogn.
- Vinavant na duai ins betg laschar cupitgà las fanestras l'entir di. L'aria fraida prend si mender l'umiditad, quella condensescha pia e fa umidas las paraids. Enstagl da laschar avert l'entir di pon ins avrir tut las fanestras sin ina giada per in curt temp per procurar per aria frestga en chasa.
- Mobiglias pli grondas na duess ins betg laschar vi da las paraids dadora. Tranter la mobiglia e la paraid na po l'aria betg circular e la schanza per miffa è pli gronda, perquai che quellas paraids èn per regla er pli fraidas (e l'aua en l'aria condensescha tranter paraid ed mobiglia).
- L'associaziun da locataris cusseglia, da betg pender si resti bletsch en chasa durant l'enviern. L'aria prend si uschia anc dapli umiditad. Sch'i na dat nagina autra pussaivladad, lura duai ins avrir regularmain las fanestras.
