Prest mintga quart velo en Svizra è in e-bike. Quai tenor Martin Platter da VeloSuisse. Ed en betg in uschè lung temp vegni a dar tuttina blers velos electrics sco velos classics. L'onn passà saja prest mintga segund velo vendì stà in velo electric. Gia oz possia ins avair il sentiment ch'i dettia dapli e-bikes sin las vias che velos senza motor. Perquai che quels vegnian duvrads dubel uschè savens sco velos cunvenziunals. Er areguard distanza è l'e-bike davant. En media vegnia ì 1 kilometer per di cun velo cunvenziunal, e 3 kilometers cun il velo electric.
- Cumenzar pass per pass. Avant che planisar la tura gronda, far emprimas experientschas en il quartier e quai plaun.
- La pli gronda differenza tranter in velo convenziunal ed in velo electric è la spertadad. In dals pli gronds privels è da sutvalitar l’agen tempo e che la via da fermar è pli lunga. Perquai èsi impurtant d’esser pront da pudair fermar da tut temp. Betg mo pervia da sasez mabain er pervia d’autras participantas ed auters participants da traffic.
- Er curs per far emprimas enconuschientschas cun l’agen velo electric e per rinfrestgar en general la savida davart las reglas da traffic pon far senn. In sbagl che capita savens en quest connex è co traversar la rundella. Impurtant è da s'enviar da mez e betg a l’ur.
- Avair envidà la glisch dal velo electric è obligatoric, e quai er durant il di.
- Er ina chapellina da velo è obligatorica per e-bikes sperts da fin 45 km/h. Dentant fai era senn da purtar ina chapellina sin models pli plauns enfin 25 km/h sco era sin velos senza battaria.
Las cifras d'e-bikes sin nossas vias s'augmentan damai rasantamain. E rasanta è er la sveltezza ch'in e-bike po cuntanscher. Cun il tempo s'augmenta il dumber d'accidents grevs. Tge che croda en egl, sch’ins guarda sin il svilup da las statisticas d'accidents da traffic sin via da l'Uffizi federal da vias ASTRA e dal Chantun Grischun, è ch’ils accidents grevs e mortals cun velos convenziunals prendan giu e quels cun e-bikes prendan tiers.
Senioras e seniors èn pertutgads il pli savens
Il dumber d'accidents cun e-bikes crescha spezialmain tar senioras e seniors. Quai di il Post da consultaziun svizzer per la prevenziun d'accidents BFU. Entant ch'il 2011 era anc 18 persunas pli veglias vegnidas blessadas grevamain u mortalmain entras accidents cun e-bikes en Svizra, eri il 2021 gia 206 persunas.
Cun vegnir pli vegls daventan persunas er pli vulnerablas. In accident ha tar persunas veglias pli spert nauschas consequenzas che tar persunas pli giuvnas. Il corp daventa pli fragil. Sper quai daventan las abilitads cognitivas pli plaunas. I vegn pli grev da valitar spertezza e distanza. Ed il tscharvè dovra pli ditg per elavurar infurmaziuns.
Privel vegn dals automobilists
La mesadad da tut ils accidents tant cun ir cun velo sco er cun e-bike èn accidents individuals. Pia accidents ch'ins ha chaschunà sezza. L'autra mesadad èn collisiuns. Quellas capitan savens sin cruschadas. Tar las collisiuns n'èn per il pli betg la velocipedista u il velocipedist il chaschunader dal accident mabain l'autra partida, per il pli ina automobilista ubain in automobilist. Quai tenor infurmaziuns dal Post da consultaziun svizzer per la prevenziun d'accidents BFU. Sper ils velos senza battaria vegnan er e-bikes spert survesids sin via. Sin l'emprima egliada èsi grev da differenziar sch'i è in velo u in e-bike. Autras participantas e participants da traffic sutvaliteschan perquai savens il tempo dad e-bikes.