Il chantun sustegn ils gieus d'enviern dals Special Olympics cun ina contribuziun da 9,5 milliuns francs. Quai han deputadas e deputads decis uanimamain (103:0 vuschs).
Quests gieus d'enviern na sajan betg mo in eveniment sportiv cun impurtanza economica e turistica, mabain gidian surtut er a realisar l'inclusiun da persunas cun in impediment. Uschia il president da la regenza Marcus Caduff durant la debatta en il Cussegl grond.
Sin invit dal president da Cuira Urs Marti, ha er Stefano Saladino persequità la debatta sin tribuna da la sala - quai en ses uffizi sco ambassadur dals atlets da Special Olympics Switzerland. Insumma: Igl è stà ina debatta pulit emoziunala, surtut cura che la deputada Anna Margreth Holzinger (PLD, Schiers) ha raquintà da sias experientschas cura ch'ella ha accumpagnà ses figl a tals eveniments.
Cuira, Arosa e Lai
Ils Special Olympics World Winter Games Switzerland han lieu il mars 2029. Durant 12 dis sa participeschan 3'000 atletas ed atlets en differentas disciplinas a Cuira, Arosa ed a Lai. I sa tracta d'ina coccurrenza che ha lieu mintga quatter onns per persunas cun in impediment spiertal - sumegliant als gieus paralimics per persunas cun impediments corporals.
L'emprima giada en Svizra
Il fanadur 2021 èn ils gieus vegnids surdads a la Svizra, sut la cundiziun che la finanziaziun saja garantida fin l'atun 2022. Il comité d'organisaziun fa quint cun custs da 38 milliuns francs per l'occurrenza. Ils gieus d'enviern da Special Olympic valan sco segund grond eveniment da sport d'enviern suenter ils gieus olimpics.