L'Uniun «Sozialwerk LGBT+» cun posts da consultaziun per giuvenils queer a Cuira ed a Buchs Son Gagl vegn schliada. Ils dus posts da consultaziun vegnan serrads. La raschun èn renfatschas da maldiever da duas persunas a la testa da l'uniun.
Pervi da quai che saja capità na possian ils dus posts da consultaziun betg pli vegnir taxads sco lieu segir per giuvenils. Quai ha la co-presidenta da l'uniun, Viktoriya Schiefer scrit, sin dumonda da l'agentura da novitads Keystone-SDA, e confermà in rapport da la televisiun TVO. Actualmain saja l'uniun vi d'elavurar in nov concept per purschidas da giuventetgna. Ils temas che duain vegnir tractads, vegnian fixads ensemen cun la giuventetgna. La purschida duai puspè vegnir realisada a Buchs. Betg cler è sch'i vegn era a dar quella en ulteriuras citads.
Cunter las duas persunas a la testa da l'uniun aveva la procura publica da Son Gagl inoltrà mez avrigl ina procedura penala. La procedura n'è anc betg a fin. Per ils accusads vala la presumziun d’innocenza.
