Il local da sentupada per persunas ord la communitad dad LGBT+ duai esser in lieu nua che giuven e vegl po sa sentir da chasa. Els pon s’inscuntrar ed ils collavuraturs porschan era cussegliaziuns. Manà vegn il local da l'uniun «Sozialwerk.LGBT+». Ma actualmain èn tant il local en la citad veglia da Cuira, sco era quel a Buchs Son Gagl serrà. Il motiv persuenter sajan stretgas da persunal. Ch'i pudess dentant anc dar auters motivs mussan retschertgas dal Tagesanzeiger.
Contact sexual cun visitaders minorens
Il manader dal local e ses um ch'è en suprastanza da l'uniun duain avair gì contact sexual cun plirs visitaders minorens. Cun in giuven che aveva da lez temp 17 onns duain els avair gì ina relaziun poliamora – en lur cas pia ina relaziun tranter trais persunas.
Datti era vinavant sustegn finanzial?
L'uniun «Sozialwerk.LGBT+» vegniva tranter auter sustegnida dal chantun e da la citad da Cuira. Quella leva er far ina cunvegna da prestaziun ed uschia sustegnair l'uniun cun 10'000 francs. Sch'i dat ussa quels daners u betg, n'è betg cler. In'alternativa fiss tenor Patrik Degiacomi d'integrar pli fitg la scena da LGBT+ en la lavur per giuvenils da la citad. Sumegliant sco la gruppa queera «whatever» ch'i deva pli baud.
I dovra era vinavant in lieu da sentupada
Ch'i dovri ina purschida per persunas da la communitad dad LGBT+, da gliez è Pascal Pajic persvadì. El è sez part da la scena e s'engascha sco part da la suprastanza da la PS grischuna per lur dretgs. In local da sentupada situada en la Svizra orientala, saja necessari ed in lieu impurtant per bleras persunas. Cunzunt per quellas che n'hajan anc betg fatg igl outen en lur conturn da famiglia, amis u scola saja il local da sentupada in lieu che dettia confiert. In lieu nua ch'ellas possian dal tuttafatg esser sa sezzas.
Pascal Pajic giavischa ch'i dettia uschè spert sco pussibel puspè in lieu nua ch'ils giuvenils possian s'inscuntrar. Impurtant saja dentant ch'ils dus umens denunziads na fetschian betg pli part da la purschida e che las structuras existentas vegnian surlavuradas. I vala la presumziun d'innocenza.
