La guerra en il Proxim Orient cumenza cun tutta fermezza ed ina fin n'è betg en vista. La situaziun umanitara daventa pli e pli catastrofala. Anc n'è l'influenza sin il moviment da fugitivas e fugitivs en Svizra betg enconuschent. Il manader da l'Uffizi da migraziun e dretg civil grischun, Markus Haltiner, quinta cun dapli lavur per l'uffizi. Gia dapi 2020 crescha il dumber da dumondas per asil en Svizra. Las prognosas per quest onn surpassan 30'000 dumondas.
Da tut las persunas che tschertgan asil en Svizra survegna il Grischun 2,3% – tenor ina clav da repartiziun. Enfin la fin da settember èn quai stadas 679 novas persunas a las qualas il chantun ha stuì dar dimora. Da dar in suttetg saja la pli gronda sfida e l'uffizi saja era vinavant a la tschertga da centers adattads, di Markus Haltiner.
Status S
Dasper las dumondas regularas per asil hai dà l'onn 2022 74'959 dumondas dad Ucranais ed Ucranaisas per il status da protecziun S, 2023 fin ils 30 da settember èn quai stà 16'861.
Da las bun 66'000 persunas cun status S che sa chattan actualmain en Svizra han 20% chattà ina lavur. La gronda part da quellas lavuran en la restauraziun e hotellaria.
En Grischun abitan, stan 13 da november, 1'375 persunas cun status S. Da quellas pon 208 lavurar, quai èn 27% da las persunas capablas da gudagnar, uschia l'Uffizi per industria, mastergn e lavur. La gronda part, radund 40% è engaschada en la gastronomia.
Sfidas malgra qualificaziun e mancanza da spezialists
Per Ucranaisas ed Ucranais fugids èsi pussaivel da survegnir la lubientscha da lavurar en Svizra. Ma da chattar ina lavur n'è betg uschè simpel. I mancan bain dapertut persunas qualifitgadas e tranter las persunas cun status S datti bleras cun autas qualificaziuns, ma cunzunt la lingua è ina sfida. Quai mussan noss exempels dad in medi che lavura sco tgirunz ed ina analista da finanzas che na chatta betg lavur perquai che ses tudestg n'è betg bun avunda.
Er il temp limità ch'il status S vala è ina sfida. Be anc fin primavaira 2025 dastgan Ucranais ed Ucranaisas lavurar en Svizra cun questa lubientscha. Per il chantun saja insacura da ponderar co ch'i giaja vinavant suenter quest temp, di Felix Birchler da l'Uffizi da migraziun. Las persunas integradas en il martgà da lavur sajan daventadas ina part indispensabla da nossa economia.
