Situaziun actuala en Mesolcina - Uschè ditg ch’ins n'audia nagins craps e mo aua, è tut en urden

L’emna passada hai pluvì fermamain, quai haja bain fatg tema, raquintan abitants ed abitantas da Lostallo. Ina dunna di che tut saja en urden uschè ditg ch’ella n'audia nagins craps e mo aua. Autra glieud n'ha nagina tema, cunquai che la vischnanca ha svidà e reparà ils batschigls da segirezza sur la vischnanca. Dentant guardian blers cun in auter sentiment envers la muntogna, nua ch’ils auals daventan pli gronds cura ch'i plova fermamain. Ina chaussa bella ch'è sa sviluppada tras la catastrofa dal zercladur è che las 900 abitantas ed abitants da Lostallo èn daventads anc pli fitg ina cuminanza. Las persunas che na s'enconuschan betg dumondan uss in a l’autra co ch'i giaja. I dettia in grond sustegn. Tge che fetschia mal, saja che trais persunas èn mortas ed ina da questas n'è anc betg vegnida chattada. Tuttina van els pass per pass en direcziun normalitad.

In grotto ch’è cumparì sut la belma

Il grotto da Luigi Fossati era suenter la bova circumdà da belma e crappa. Uss, bunamain quatter mais pli tard ves'ins puspè il funs. Cun agid da voluntaris ha el mess davent la crappa e la belma. E tuttina resta l'um pensiunà positiv. El abita gia dapi ditg a Lostallo e di che quai saja normal ch'i vegn giu material da la muntogna – dentant betg adina en questas massas sco quest onn. El raquinta ch’el n'haja betg tema cura ch'i plova fermamain, cunquai ch’el na possia uschè u uschia midar nagut. La finamira è d’avrir il grotto la primavaira e servir als clients costini.

En dus onns duai Sorte puspè esser abitabel

Sorte, ina part da Lostallo, è vegnì tutga fermamain da la malaura. Ina gronda bova ha tratg cun chasas e sutterrà quatter persunas. Ina da questas persunas è vegnida salvada, duas chattadas mortas ed ina resta vinavant sparida. Il suprastant da la vischnanca e manader da l’acziun, Moreno Munticelli di, che Sorte saja en circa dus onns puspè abitabel. Actualmain è Sorte anc ina zona cotschna. Gronda crappa circumdescha las chasas. Uss spetgan els sin la nova carta da privels dal chantun. Vitiers èn els vi da bajegiar ina paraid da segirezza sur la vischnanca. Era la riva da la Moesa furman els puspè sco avant. Moreno Munticelli di, ch’el possia far la differenza tar la lavur tar questa catastrofa, uschia ch'i na tutgia betg uschè ferm el. Dentant dettia era ad el in curius sentiment cura ch'i plova fermamain. La crappa ed il material che è anc da vesair en blers lieus a Lostallo saja per blera glieud in monument da la malaura e da la bova. Cura che quai saja tut davent possia la glieud forsa ir enavos a la normalitad. Quai dovria dentant anc in temp.

Uschè bleras annunzias da donns d’edifizis sco normalmain en 4 mais

Curt suenter las malauras ha la vischnanca da Lostallo valità ch’ils donns custian 38 milliuns francs – quai pertutga ils edifizis, las vias e l’infrastructura. La Assicuranza d’edifizis dal Grischun ha valità 310 donns vi da las chasas e quests importan 8,5 enfin 10 milliuns francs. La assicuranza ha normalmain 1'000 cas per onn. En la Mesolcina han els pia survegnì var in terz da quest dumber entaifer paucas emnas. Annunzias da donns elementars han els survegnì 440 da la Mesolcina. Quai pertutga prads e surfatschas d’agricultura. En tut custan quels donns circa trais milliuns francs.