L’annunzia da la mesemna passada che l'hotel «La Siala» a Falera serria definitivamain las portas la fin mars 2025 è stada in pau ina surpraisa. Quai suenter ch’ils possessurs Roland Anderegg, Armin Casutt, Gion Candreja e Max Bachofen han investì ils davos nov onns «plirs milliuns francs» en la renovaziun ed il mantegniment da l'hotel, sco quai che Roland Anderegg - il president dal cussegl d’administraziun da l'hotel - punctuescha. Tenor el han trais motivs principals impedì da realisar l’idea d’antruras da segirar a Falera il sulet hotel en vischnanca.
Curta stagiun auta
«La stagiun che cuzza davent da mez december fin Pascas è memia curta.» Roland Anderegg menziunescha las duas stads da corona, nua che la plipart da la Svizra ha sfurzadamain fatg vacanzas en la patria e ch'ha era purtà a l'hotel «La Siala» osps ed entradas cuntentaivlas. «Suenter corona è la stagiun da stad crudada en tschaler.»
Ils possessurs da l'hotel han era stuì realisar ch’il sistem da l'hotel d’appartaments da «La Siala» che deriva dals onns 70 na funcziuna betg pli. «Quai sistem n'è betg da cumparegliar cun in Rock Resort a Murschetg, nua ch’ils possessurs da las abitaziuns pon be far diever durant in curt temp da l’atgna abitaziun.» Roland Anderegg di ch’ils possessurs da las abitaziuns colliadas cun «La Siala» hajan occupà ils abitadis durant la stagiun auta. «Al manaschi d'hotel èn bleras abitaziuns stadas a disposiziun sulettamain durant la tranterstagiun.»
Persunal qualifitgà
In auter problem vesa Roland Anderegg en l'engaschi da persunal qualifitgà.
Jau crai ch’in hotel en la grondezza da «La Siala» sa laschà manar sulettamain sco manaschi da famiglia – cun confamigliars che n’èn almain per part betg suttamess a stricts temps da lavur e pronts da s’engaschar anc dapli per il manaschi durant la stagiun auta
Els sco possessurs hajan era empruvà da vender l'edifizi:«En vista a la valur da retgav da l'hotel ina chaussa nunpussaivla.» Roland Anderegg punctuescha ch’ils investurs e las investuras sajan stadas pertschartas gia a l’entschatta da betg pudair far gronds gudogns cun l'hotel. «Nossa finamira è stada da mantegnair il sulet hotel da Falera e da scriver almain ina nulla naira.» Quella nulla naira n'è dentant betg sa verifitgada, uschia ch’ils possessurs pondereschian ina midada da nez. «Per il mument èsi anc memia baud da communitgar en tge direcziun ch’i va.»
Plirs manaschis en vendita
Il «La Siala» n'è mumentan betg il sulet manaschi d'hotel che serra sias portas la fin da la stagiun d’enviern. Quai vala era per l'hotel «Postigliun» ad Andiast, damai ch’ils possessur e la possessura Guido e Corina Sgier van en pensiun. Auters hotels sursilvans èn actualmain en vendita sco in’egliada sin la pagina da «RealAdvisor» tradescha. Per exempel l'hotel «Steinbock» a Val Sogn Pieder che sa chatta gist sper las pendicularas. Cumprar pon ins era l’«Ustria Cristallina» a Laax che porscha medemamain alloschi en diesch chombras. L'hotel e pensiun «Pèz Terri» a Vrin è gia dapi in temp sin fiera e dus hotels pon ins cumprar en la vischnanca da Tujetsch: l'hotel «Crestas» e l'hotel «Postigliun».
La situaziun dals hotels en la Val Tujetsch fa in zic quitads al president da Sedrun Mustér Turissem, Silvio Schmid. «La midada da generaziun tar ils manaschis da famiglia è difficila.» Silvio Schmid ha fatg persenn che la generaziun giuvna n'è betg pronta da s’engaschar en quella moda per in manaschi sco ils geniturs. «Per la generaziun giuvna è la balantscha tranter lavur e temp liber impurtanta.» Ina balantscha che Silvio Schmid na vul betg be valitar negativ: «Ins vul era avair dapli temp per la famiglia.» Vinavant fa el valair che las pretensiuns dals osps sajan creschidas: «Ils giavischs e basegns individuals per exempel envers la cuschina èn gronds.»
Speranza sin il resort a Dieni
Il persident da l'organisaziun turistica è conscient ch’igl n'è betg simpel da chattar cumpraders per in hotel: «Ins po bain midar niz e porscher abitaziuns, per exempel per emploiadas ed emploiads turistics. Sche nus avain dentant nagins hotels pli, sche na duvrain era betg abitaziuns per il persunal.» Silvio Schmid metta perquai gronda paisa sin il resort planisà a Dieni che duai porscher l'alloschi turistic futur en la Val Tujetsch.
A la tschertga da schliaziuns
Il president communal da Falera, Norbert Good, deplorescha fitg ch’il «La Siala» serra la fin mars. Dal tuttafatg surstà n'è el betg, damai ch’el enconuscha sco anteriur turisticher ils problems dals hotels turistics en il sectur da trais stailas.
La vischnanca è involvada en la tschertga da schliaziuns.
Norbert Good manegia ch’ins vegnia da far in contract cun la proprietad da condomini da las abitaziuns e laschar a tschains quellas via ina plattafurma: «Nus sperain da pudair porscherasilmain 30 da las 70 abitaziuns sin quella plattafurma e cun quella purschida era da rinforzar la stagiun da stad.»
Per l'auter regorda il president communal da Falera al resort planisà a l’entrada dal vitg da Falera: «Per il mument stuain nus spetgar la decisiun da la dretgira en connex cun in recurs.» Norbert Good vesa tschertas pussaivladads d'utilisar sinergias cun l'Hotel La Siala, sch’il resort po vegnir bajegià. «Per il mument na pudain dentant far nagut auter che spetgar la decisiun.»