Avant trais mais aveva il president communal da Alvra, Daniel Albertin, annunzià da dar giu ses post sin la fin da l'onn. Quai suenter diesch onns en uffizi. Fin uss n'ha dentant nagin s'annunzià per candidar. Las elecziuns èn vegnidas spustadas sin ils 24 da november.
Per Daniel Albertin è quai ina surpraisa. El saja ì or da quai ch'ins chatta ina successiun. Che nagin è s'annunzià, cun quai n'haja el betg quintà, di el envers Radio RTR. La speranza da chattar ina persuna saja anc qua. I vegnia dentant adina pli difficil, cun quai ch'il temp fin al di d'elecziuns passa.
In nuf difficil
«Era cun discurrer cun differentas persunas n'èsi betg gartegià da persvader insatgi», aveva el ditg l'entschatta dal mais envers l'FMR.
Ed alura guardainsa, sche nus vegnin da schliar quest nuf, igl è però difficil.
Per cass ch'ins na chatta nagin, saja la suprastanza dentant abla da manar la vischnanca senza ina presidenta u in president – silmain in tschert temp.
La dumonda sche Daniel Albertin prolungass forsa tuttina ses temp en uffizi sur il prim da schaner or, lascha el avert. I giaja uss en emprima lingia da chattar in successur. Sch'el annunziass da restar en uffizi, vegniss la tschertga d'in successur u ina successura anc pli difficila.
E la vicepresidenta?
Però, ha la vischnanca d'Alvra, sco mintga autra vischnanca era, ina vicepresidenta, numnadamain Patrizia Zanini, anteriura presidenta communala da Casti. Fissi damai in'opziun, ch'ella surpiglia il presidi? Daniel Albertin refusescha: «Igl n'è strusch pussaivel da surpigliar in mandat da presidenta communala da 50% sch'ins lavura insanua en in pensum cumplain da 100%. Sche las structuras enturn ina persuna n'èn betg avant maun, alura na vai simplamain betg.»
I duvrass in augment dal pensum
Daniel Albertin è vegnì elegì il 2015 sco emprim president communal da la vischnanca fusiunada en Val d'Alvra. Cun sia demissiun anticipada èsi d'eleger in successur u ina successura per il rest da la perioda d'uffizi che cuzza enfin la fin da l'onn 2026. Ch'el sa retiria aveva il president communal partent declerà il fanadur 2024 tranter auter suandantamain: La bova da Brinzauls ed il temp da lavur che quella pretenda.
Tenor me duvrassi radund 80% per pudair manar la vischnanca ed esser à jour cun tut ils projects e las sfidas da Brinzauls.
Tenor constituziun da la vischnanca è il pensum però reglà cun 30 enfin 50%.
