La staziun a val da Parsenn a Tavau è plain glieud che spetga sin l'emprima pendiculara da persunal da las 07:00 – ma tuttenina aud'ins ina annunzia: «Pervia d'in problem tecnic sa retardescha la pendiculara.»
Tschertins s'agitan, autras prendan la situaziun cun umor. Sandro Nuotclà na fa nagins quitads. Il giuven cun chapitscha naira e skis enta maun chapescha numnadamain insatge da pendicularas: «Quai è fitg segir. Tut po capitar, e la pendiculara na va nagliur.» El è numnadamain en l'emprim onn da ses emprendissadi sco mecatronist da pendicularas - el è in da quels che guarda che tut funcziuna.
La suga da la pendiculara pudess stgarpar e la pendiculara restass airi – qua na capita nagut. En quest cas stuess ins sulettamain ir a pe ensi.
In'ura pli tard è ella pronta ed il persunal po entrar. Cun els era Sandro Nuotclà e tut ils auters mecatronists da pendicularas.
-
Bild 1 von 3Legenda: Sch'ins sorta da la pendiculara, arriv'ins a la staziun «Parsenn Rapid». RTR
-
Bild 2 von 3Legenda: Dasperas è era gist in'ustaria. RTR
-
Bild 3 von 3Legenda: La vista davent da la terrassa dal restaurant. RTR
Arrivà sisum va l'emprendist gist per in grond tarader e cumenza a furar foras en la naiv. Quai fa el per metter si ina rait, di Sandro. «Per ch'ils turists sappian nua ch'els ston ir». Ma tutga quai tar sia lavur? Fin uss n'ha quai anc da far nagut cun pendicularas. Na, conferma el – el stoppia gidar, perquai ch'insatgi è malsaun. «Ma er quai tutga tar mia professiun», di el.
Cura che tut è preparà per ils giasts, va el sin ina runda da controlla. Ina runda quotidiana, nua ch'el va ina giada si e puspè giu cun la sutgera.
Sch'igl ha navì u sch'igl era fraid, poi esser che las rollas èn scheladas – là poi dar stgarps en la gumma.
Cun ir sperasvi taidla e guarda el, sch'insatge tuna u para nunusità. «Quai sent'ins bain. Ins auda lura in tun sco: tac tac tac.»
-
Bild 1 von 4Legenda: Sandro fora en la naiv per tschentar si la rait. RTR
-
Bild 2 von 4Legenda: La staziun Parsenn Rapid. RTR
-
Bild 3 von 4Legenda: Sur notg èn las sutgas da la sutgera parcadas en ina halla. RTR
-
Bild 4 von 4Legenda: Ina suenter l'autra sortan ellas. RTR
Igl è in bellezza di d'enviern a Tavau cun sulegl e gnanc in sulet nivel al tschiel. «Insacura na stim'ins gnanc pli da quai», di Sandro. Il sulegl glischa sin la naiv ed igl è ina fradaglia ch'igl arda in pau sin la pel. Tar Sandro na badan ins betg la fradaglia.
Ulteriuras persunas or dal mund da las pendicularas
Ina incumbensa centrala da sia lavur sco mecatronist da pendicularas è la controlla. Sco Sandro raquinta èn els responsabels che la tecnica funcziunia che las rollas na sajan betg ruttas e che las sugas sajan adina unschidas cun ieli.
Suenter avair fatg in fufragnadi sco mecatronist da pendicularas, sun jau stà «hin und weg».
Sch'insatge na fiss betg en urden, stuess la pendiculara vegnir franada – ma er mo sch'insatge è propi rut. En il cas normal pon ins tenor l'emprendist era laschar ir la pendiculara, sch'i tuna in zic curius. Quai pon ins lura sclerir la saira cura che tut ils giasts èn puspè davent.
-
Bild 1 von 2Legenda: L'emprima runda la damaun cun la sutgera. RTR
-
Bild 2 von 2Legenda: In bellezza di d'enviern. RTR
Suenter questa runda conferma el che tut è en urden ed ils emprims giasts dastgan ir sin la sutgera. Da moda sumeglianta cuntinuescha el l'entir di – controlla suonda a controlla.
L'enviern sto la pendiculara simplamain ir.
La lavur la stad e l'enviern variescha fitg per in mecatronist da pendicularas. L'enviern ston las pendicularas simplamain ir, ins n'ha betg gronda peda da guardar tut en detagl. La stad dentant, cura che las pendicularas stattan airi, pon ils mecatronists e las mecatronistas da pendicularas lavurar en ruaus e per exempel barattar las rollas vi da las pitgas. Quai plascha in zic meglier a Sandro, admetta el.
Uss èsi dentant enviern e perquai ch'insatgi è crudà ora, stat il giuven mintgatant era tar ils runals. Quai è sa chapescha in zic pli lungurus che la lavur en in'autezza da 100 meters cun in helicopter dasperas.
In mecatronist cun talent per il scriver:
Or da l'archiv: