Sco il cusseglier guvernativ Mario Cavigelli ha ditg sin ina dumonda en il Cussegl grond, hajan ins perquai dumandà l'Uffizi federal per ambient per arguments en detagl, daco ch'ins na dastga betg sajettar ils lufs. Tenor l'Uffizi federal per ambient sajan ils criteris betg ademplids.
Igl dat duas decisiuns dal BAFU che na cuntentan insumma betg nus.
Cun quels arguments en detagl, quai è ina uschènumnà decisiun contestabla, ha il chantun la pussaivladad dad ir avant il Tribunal administrativ federal. Quel stoppia lura interpretar la situaziun giuridica e decider sch'il BAFU, che na vul betg ch'ils lufs vegnan sajettads ha raschun u il chantun.
La dumonda en connex cun il triep da Stagias sisura la Surselva duai gia questa emna vegnir inoltrada al tribunal.
Sa chapescha essan nus persvadids che nus avain buns arguments per nossa tenuta.
La decisiun contestabla pertutgant il mastgel dal triep dal Beverin vegn anc spetgada. La finamira na saja betg mo da survegnir uss la lubientscha per sajettar ils lufs che chaschunan problems mabain er da survegnir per il futur ina segirtad giuridica, cura ch'ì saja pussibel da sajettar il luf e cura betg. E quai betg mo per il chantun Grischun mabain er per auters chantuns.
