Il chor viril da Domat va novas vias: cunquai che l'onn 2025 è senza Festa da chant chantunala e senza ina festa da chant districtuala saja quai ina buna chaschun d'emprender d'enconuscher auters chors ed autras furmaziuns da la regiun Plaun – e quai tut senza il squitsch da diploms e valitaziuns, declara Gian Pinchera sia idea. Il president dal chor viril da Domat ha spert survegnì sustegn da ses agen chor ed er ils chors da la regiun Plaun/Imboden èn bugen stads pronts da vegnir a chantar e star da cumpagnia a Domat la sonda saira.
En il center stat il plaschair e la cumpagnia.
I fetschia grond plaschair ch'ils chors fan part a la saira musicala da cuminanza, di Gian Pinchera. Spezial plaschair haja Gian Pinchera era che la scola da Domat sa preschenta cun in chor furmà aposta per quella saira da chant. Sper il chor viril da Domat vegnan er a chantar il chor dals Paslers, il chor mischedau da Razén, il chor Concordia da Panaduz, il chor Allegria da Favugn ed il Jodelchörli Sardona.
Or da l'archiv
