Il RS virus fa dapli che mo ina strucca; el po attatgar las bronchias ed ils pulmuns dals uffants, uschia ch'els dovran tut lur energia per respirar e n'han betg pli la forza per baiver u mangiar. Il nov vaccin «Nirsevimab» reduceschia il dumber da cas grevs che dovrian per 80% ina tgira en l’ospital, scriva l’Uffizi federal da sanadad publica. Grazia al tractament possian ins evitar uschia ina lunga via dolurusa d'uffants e da geniturs. Tenor ils tests chaschunia il medicament paucs effects laterals, perfin damain che auters vaccins.
Quant ferma che la proxima stagiun dal virus RS è, na pon ins betg dir. Quai dependa da la quota da vaccinaziuns.
Ils ultims onns ha il RS Virus emplenì las staziuns d’uffants en ils ospitals svizzers e manà quellas a lur cunfins e surora. L’Uffizi federal da sanadad publica discurra da 3’000 enfin 6’000 uffants che sajan vegnids ospitalisads mintg’onn pervia dal virus. Ils ospitals speran che la vaccinaziun possia calmar questa situaziun. La stagiun dal virus cumenza ussa. La dumonda è sche la vaccinaziun vegn anc ad uras per questa stagiun, uschia ch'ella pudess evitar in'epidemia ed ina gronda quantitad d'uffants en l'ospital sco quai ch'i era il cas l'enviern 2023/2024. Dentant dependia quai surtut da la voluntad dals geniturs da laschar vaccinar lur uffants. Da far ina prognosa saja grev, di Bjarte Rodgo, il schefmedi da la clinica d'uffants da l'Ospital chantunal dal Grischun. Ils ins vegnian a laschar vaccinar lur uffants, ils auters betg.
