Agitaziun a Domat pervi da l'aua da baiver. En il rapport scriva la gasetta Südostschweiz che la firma Hamilton haja laschà examinar l'aua da spina e sin basa dals resultats infurmà las collavuraturas ed ils collavuraturs da desister da baiver l'aua da spina.
Il chemicher chantunal Mathias Beckmann di dentant ch'i n'exista insumma nagin privel per la sanadad. Quai conferma er il president communal Erich Kohler. El haja gì fitg bleras reacziuns e dumondas da la populaziun, el possia dentant dir che l'aua da baiver da Domat saja schubra.
La Hamilton ha mesirà 0,27 micrograms, la vischnanca a l'origin da l'aua dentant 0,22 micrograms. La valur mussa tenor Beckmann be ch'igl haja restanzas che n'èn betg en l'aua natiralmain, mabain pervi da carstgauns. I saja da prender mesiras per reducir, ma in privel na munta quai betg. Notabene èn las limitas en Germania ed Austria tar 3 micrograms.
Soluziun gia quest onn
Cun retrair l'aua da baiver per gronda part da l'aua sutterrana haja Domat ils davos onns tschertgà ina soluziun per dapli aua, quai per garantir a lunga vista il provediment. Cun la vischnanca vischina da Tumein hajan ins chattà la soluziun optimala. Domat survegn uschia gia quest atun aua da funtauna.
Chlorothalonil
En l'aua da spina da Domat han ins chattà gia pli baud las restanzas dal pesticid. Quel è vegnì scumandà avant quatter onns. Ch'ins ha chattà il product R471811 en l'aua a l'ur da Domat stettia en connex cun il terren agricul en quella part da la vischnanca. Chlorothalonil saja vegnì duvrà sco pesticid per la cultivaziun dad ers.
