La pandemia da corona fruntia sin ina nauscha situaziun tar il persunal da tgira. Uschia resumescha Renate Rutishauser, presidenta da l'Associaziun da las tgirunzas e dals tgirunz en Grischun, la situaziun actuala. Gia avant il lockdown hai dà plitost pauc persunal da tgira. Ils sforz en connex cun la pandemia haja pegiurà la situaziun.
Ils quitads immediats èn, che blers èn exausts, vegnan malsauns e mancan lura en ils teams.
Sch'intginas persunas crodan ora, stoppian las autras tgirunzas e tgirunz surprender quella lavur. «Quai è in circul dal diavel», manegia Renate Rutishauser.
Ina tema ch'ella ha a lunga vista: Sche la professiun vegn adina pli pretensiusa e pli stressanta, pudessian blera glieud smetter da lavurar. En congual cun la situaziun dal mars, na saja er la motivaziun betg pli uschia gronda. Tenor ils resuns ch'ella survegn da commembras e commembers da l'associaziun, sajan blers demotivads ed exausts.
Nagina soluziun a curta vista
Uss, entamez la crisa, na saja betg pussibel da chattar ina soluziun. Tenor la presidenta da l'Associaziun da las tgirunzas e dals tgirunz, dovri ina soluziun per tut la branscha. Sche las cundiziuns da lavur e uschia tut la lavur vegn pli attractiv, saja era pussibel da chattar dapli persunas che vulan lavurar en quella professiun. Quai saja dentant ina sfida che la branscha ensemen cun la politica stoppia schliar.