La regenza grischuna beneventa che las mesiras da protecziun vegnian schluccadas pass per pass a partir dals 27 d'avrigl. Sch'il dumber da novas infecziuns restia moderà e sch'il Cussegl federal permettia, sajan pussaivels proximamain ulteriurs pass da schluccada per l'economia ed eventualmain per il turissem grischun, uschia il cusseglier guvernativ Marcus Caduff.
Per planisar la stagiun da stad saja necessari per tut ils involvids, tant per purschiders sco er giasts, da pudair numnar in spazi da temp pussaivel. Quai dettia segirezza.
Normalisaziun parziala en il sectur da sanadad
A partir da glindesdi dastgan ospitals e clinicas puspè far intervenziuns ambulantas ch'èn betg urgentas. Per quest intent stoppian els dentant elavurar in concept cuminaivel che garanteschia ch'i sajan vinavant avant maun avunda letgs d'ospital per pazients da Covid-19. Auter ch'en cas excepziunals sajan visitas en ospitals er vinavant scumandadas. Percunter sajan visitas en chasas da tgira e da vegls pussaivlas sut circumstanzas. Responsabla per la decisiun saja mintgamai l'instituziun, uschia il cusseglier guvernativ Peter Peyer.
Dapli tests per persunas cun sintoms
Per cumprovar il virus pon da nov vegnir fatgs fruschs dal nas e da la gula tar tut las persunas cun sintoms, ha declerà la media chantunala Marina Jamnicki. Fin ussa eran quests tests reservads a las gruppas da ristga. Tgi ch'haja sintoms da malsogna sco fevra e tuss, mal la gula, difficultads da respirar, mal ils musculs u ina perdita da l'odurat e dal palat, duaja isolar sasez e telefonar ad ina media u ad in medi. Ier aveva l'Uffizi federal da sanadad schlargià ils criteris per laschar testar.
«Social distancing» e reglas d'igiena vinavant decisivas
Er en il rom da l'emprim pass da schluccada saja impurtant da sa tegnair vid las mesiras da protecziun, sco er da respectar il scumond da gruppas cun dapli che tschintg persunas. In nov augment da las infecziuns periclitass er ils proxims pass da schluccada ed in'eventuala stagiun da stad turistica pussaivla, uschia Jamnicki vinavant.
Blers civis en acziun
Dapi l'entschatta da la crisa hajan almain 514 persunas prestà en tut 4'029 dis da servetsch da protecziun civila. Quai ha ditg il schef dal stab directiv chantunal Martin Bühler. Actualmain s'engaschian anc 132 civis en differents secturs.
