Il president da la secziun Engiadina Bassa-Val Müstair dal CAS Andri Planta è trumpà da la resposta da Losanna. Tenor Anita Mazzetta dal WWF saja stà da quintar cun questa resposta dal Tribunal federal.
Da nossa vista eri cler ch'ins na po betg lubir ina tala chamona ordvart la zona da bajegiar – las premissas persuenter n'eran betg ademplidas.
Era la presidenta communala da la Val Müstair, Gabriella Binkert Beccheti è trumpada. Dapi intgins onns saja la relaziun cun las organisaziuns per la protecziun da l'ambient stà meglra ch'era gia. Il cumin s'haja stuì decider da tge vart da la val ch'el veglia realisar projects turistics.
Ussa che nus stuain proteger la Val Mora cumplettamain, spetgain nus da las organisaziuns per l'ambient ch'ellas tegnan lur pled e retiran il plant cunter il project Sassa/Minschuns.
Anita Mazzetta n'è betg perina cun la pretaisa da Gabriella Binkert Beccheti. Tenor ella fiss il cumpromiss stà sin maisa il mument ch'il cumin avess retratg il project Alp Sprella. Uss ch'i saja cler che quel na fiss gnanc stà pussaivel legalmain, possian ins sa dumandar sch'il cumpromiss pudess lura insumma esser ina mesira da cumpensaziun.
Il project Sassa prevesess in nov resort da vacanzas a Tschierv – in'investiziun da var 40 milliuns francs. La premissa dals investurs e da las investuras è però ch'i vegn realisà sco emprim ina nova pendiculara sin il territori da skis da Minschuns. Cunter quella pendiculara avevan las organisaziuns per la protecziun da l'ambient era fatg recurs. Tenor Gabriella Binkert Beccheti fissi fatal per la val, sch'il segund project vegniss era davant il Tribunal federal. Anita Mazzetta manegia ch'il recurs saja il mument sistì. Sche quel vegnia persequità vinavant vegnia decidì cura che tut saja sin maisa.
Project Alp Sprella
Sin l'Alp Sprella che sa chatta sin 2'128 meters sur mar na datti nagina aua currenta, nagina electricitad e nagina rait. Qua vuleva il Club Alpin Svizzer («CAS») transfurmar ina tegia existenta ad ina chamona da CAS cun 54 letgs e promover uschia la spierta turistica existenta. Ils derschaders e las derschadras las pli autas a Losanna han uss però dà raschun al recurs dal WWF e da la Pro Natura cunter il project.
Gia objecziuns tar dumonda da construcziun
Gia l'onn 2010 aveva il CAS inoltrà ina dumonda da construcziun pertutgant l'Alp Sprella. Il project era vegnì elavurà curt suenter che la Val Müstair era s'unida ad ina vischnanca politica. L'idea era che l'Alp Sprella daventia in punct da partenza per turas da viandar, da muntogna e da bike. Gia lura avevi dà objecziuns.
Set onns pli tard ha il CAS inoltrà ina segunda dumonda da construcziun d'in project pli simpel: senza manaschi d'enviern, senza tract da colliaziun, senza indriz per bikes e cun pli paucs letgs. L'onn 2021 ha il CAS survegnì la permissiun da bajegiar cunter la quala la Fundaziun svizra per la protecziun da la cuntrada, il WWF e la Pro Natura han fatg recurs. Lur argument era ch'ina chamona da CAS moderna atirassi anc dapli glieud en la vallada, quai che disturbass la natira unica.
La Dretgira administrativa grischuna ha refusà il recurs. Il WWF e la Pro Natura han sinaquai fatg recurs al Tribunal federal. Pervia da l'effect suspensiv è il project stà airi durant il process.
Nova chamona betg exnum necessaria
Il Tribunal federal ha concludì ch'il project da fabrica n’è betg lià al lieu. Quai fiss necessari per il bajetg en la zona d'agricultura, uschia ch'el cuntrafa a la lescha da planisaziun dal territori. Il Tribunal federal argumentescha che tut las muntognas en il conturn èn accessiblas era dals alloschis existents en la val. Ina chamona supplementara na saja pia betg necessaria - era betg sco alloschi d'urgenza.
Cun questa decisiun vegnan annullads ils anteriurs permiss dal cumin da Val Müstair e dal chantun Grischun. Il CAS sto pia desister da ses project. Per las autoritads grischunas munta quella decisiun in regress en lur sforzs da sviluppar la spierta turistica en la regiun isolada. La decisiun pudess er avair in effect da signal per projects sumegliants en autras regiuns alpinas.
Or da l'archiv: