RTR rapporta live da la chamona Linard a Lavin – perquai avain nus stgavà en las profunditads da l'archiv e chattà istorgias da ed enturn chamonas. La chamona Linard ha in sistem in zic spezial da guardiachamona. Gia il 2017 avain nus visità ella e mussà quest sistem . Dapli davart la visita actuala sin la chamona Linard chattais qua:
Il 1970 ha la vita sin las chamonas anc vesì ora in zic auter ch'oz. Quai mussa il suandant exempel ch'illustrescha la vita dal mintgadi d'in pèr sin la chamona dal Bernina.
Chamona Tuoi a Scuol
Il 1978 è la chamona Tuoi dal Club alpin svizzer da la secziun d'Engiadina Bassa vegnida inaugurada. 183 dis hai cuzzà da construir questa chamona. Il segund video mussa il mintgadi dal guardiachamona il 1981.
La chamona da Maighels è il 1985 vegnida inaugurada durant l'enviern. Ina gruppa da salvament ha anc avant l'inauguraziun stuì segirar la ruta per ils osps.
Il medem onn è er la chamona renovada CAS en val Medel vegnida inaugurada. Pliras funcziuns da «luxus» sajan vegnidas vitiers. Per l'ina l'aua currenta, cellas da solar per il telefon e la glisch, sco er tualettas da stad e d'enviern en la chamona.
Svilup a la cummadaivladad
L’architectura da las chamonas dal CAS è sa midada fitg – las pretensiuns davart il confort e l’ecologia creschan cuntinuadamain. La chamona Montarosa a Zermatt mussa en tge direcziun ch'il svilup po ir. Ed er la chamona Kesch è plitost hotel che chamona.
Tge ch'i dovra per renovar ina chamona mussan era las impressiuns da la chamona Grialetsch. Luxus e modern maschadà cun la simpladad d'ina chamona. Sistems da hightech per porscher cummadaivladad en ina cuntrada plitost criva e bruta.
Chamona sco refugi che spendra la vita
A chaschun dal giubileum da 60 onns Rega ha il Telesguard preschentà regurdientschas vi dad in salvament spezial. L'onn 1965 è ina gruppa da battasendas da la Bassa stada bloccada en la chamona d'Etzli en la regiun da l'Alpsu. Otg dis suenter ch'els n'èn betg returnads da lur tura èn els vegnids salvads.
150 onns Club alpin svizzer
L'istorgia dal Club alpin svizzer han ils Cuntrasts tematisà il 2013 a chaschun dal giubileum.
Provediment d'aua è central
Mancanza d'aua periclitescha il mantegniment da chamonas. Cur ch'il glatscher lieua n'hai betg pli avunda aua per pudair garantir il manaschi da la Chamona Lischana.