Il program da la radunanza generala da l’Ems Chemie è vast – era quest onn. Musica da la big band Allegra, dals tamburs da Domat e lura er anc in menu da trais plats. Dentant sco quai ch'i tutga èn era las cifras da fatschenta da l'onn current vegnidas preschentadas. La svieuta che l'Ems Chemie ha cuntanschì l'emprim mez onn munta a 1,183 milliardas francs. Uschia ch'ella è per 7,9% pli bassa ch'avant in onn.
Quai na para dentant betg a disturbar las acziunarias ed ils acziunaris. Passa 2'000 persunas che possedan total 91% da las aczias èn stads la sonda a Domat:
Ch'i va mintgatant ensi ed engiu vegn avant tar tut las interpresas.
Nagins quitads malgrà dividenda pli bassa
Els hajan vinavant fidanza en l'interpresa e las persunas che stattan u stevan davos quella. In acziunari di per exempel ch'el saja gia daditg fan da Christoph Blocher ed in'autra acziunaria di ch'ins na stoppia betg fa quitads per la Ems Chemie. Magdalena Martullo fetschia gea buna lavur. Uschia na disturbi era betg che la dividenda è quest onn per in franc pli bassa che l'onn passà. Quest onn datti 20 francs per aczia.
