La Ems Chemie ha fatg l’onn passà ina svieuta da record. Quella saja s’augmentada per passa 8% sin 2,44 milliardas francs. Quai ha communitgà la gruppa Ems. Bain saja il gudogn sa reducì per passa 3% sin 535 milliuns francs, tuttina sa tractia dal segund grond gudogn en l’istorgia dal concern. Il cussegl d’administraziun propona a la radunanza generala da pajar ina dividenda da 20 francs per aczia.
Resultat da gestiun bunamain 5% pli bass
Il resultat da gestiun u EBIT haja muntà a 611 milliuns francs è saja stà, lià a la conjunctura ed als curs da stgomi, per 4,6% sut quel da l’onn da record 2022. La raschun saja la situaziun da la conjunctura sco era il curs pli flaivel da la valur estra.
Program d'investiziun è en lavur
Il program d'investiziun ch'è vegnì annunzià l'onn passà per augmentar la capacitad e l'effizienza d'energia al lieu principal a Domat da passa 300 milliuns francs sajan ins vid metter en pratica. Ulteriurs lieus da producziun sajan era vegnids renovads.
Prognosas positivas malgrà situaziun da conjunctura moderada
Las prognosas per l’onn current sajan medemamain positivas: La Ems Chemie quinta cun ina svieuta ed in resultat da gestiun che saja levet sur quella da l’onn passà. Quai malgrà ch'els quintan quest onn cun ina conjunctura moderada – spezialmain l'emprim mez onn areguard la situaziun da COVID-19 en China e pervia da l'atmosfera da consum deprimida en l'Europa. Conflicts geopolitics, dumondas d'energia avertas ed ulteriurs augments dals tschains per cumbatter l'inflaziun modereschian il svilup economic.
