Fabian Maasch ha surpiglià l'uniun Cuira Turissem il favrer passà cura che l'orcan era gia puspè tschessà in zic. Avant ha Renya Heinrich manà l'uniun per dus onns. Il mument che lezza ha surpiglià eran gia trais auters mainafatschenta stads a la testa – tuts entaifer l'onn 2022.
Che Cuira Turissem ha pia ils davos onns gì da sbatter cun midadas e pauca cuntinuitad è nagin misteri. E gist là vesa il mainafatschenta actual Fabian Maasch il pli grond potenzial.
Nus vulain stabilitad uschia che nus pudain per in lung temp lavurar ensemen cun il team ed uschia era pudair crear novas purschidas.
Daco ch'ils mainafatschenta hajan propi chalà – per part suenter paucs mais, per part suenter paucs onns – quai na veglia e possia el betg dir. Damai ch'el saja pir dapi curt a la testa da l'uniun na possia el betg prender posiziun. Sandra Adank ch'è dapi il 2022 co-presidenta da Cuira Turissem lascha dentant sentir che las visiuns na sajan betg adina stadas congruentas tar las persunas al timun da l'uniun.
La strategia resta
Ussa hajan els dentant in nov mainafatschenta e per gronda part er in nov e giuven team. Tge che resta dentant per gronda part è la strategia. Ina strategia che definescha Cuira sco «Boutique City» pia ina citad pitschna senza memia bler turissem ma cun bler stgazis culturals.
Concret vulan els sa focussar sin persunas ch'arrivan cun tren, viadis da cultura en museums ed exposiziuns sco era sin amaturs da bike e visitadras dal di. Sco il mainafatschenta Fabian Maasch di, fissi donn da be sa focussar sin ina da quellas purschidas. Uschia acceptan els era ch'ins na collia Cuira forsa betg direct cun ina purschida sco «Cuira: la citad per ils bikers» mabain ch'els bajegian sin pliras pitgas.
367 commembras e commembers
Cuira Turissem ha commembras e commembers or da diversas branschas sco la hotellaria, gastronomia, il commerzi en detagl, la mastergnanza ed era persunas privatas. Dad ademplir lur giavischs ed unir ils desideris multifars, saja mintgatant ina sfida, conceda Fabian Maasch.
Daniel Schwarz da la fatschenta da vin e chaschiel «gust» e Beat Gansner che maina la chamona da CAS Calanda speran tras la collavuraziun cun Cuira Turissem da cuntanscher dapli clientella. Quai vulan era Sandro Münger che maina ils hotels Mercure ed Ibis a Cuira sco era Muriel Stillhard, la manadra da l'agentura da communicaziun Miux. Sper quai giavischa il hotelier da savair en tge direcziun ch'i giai tar Cuira Turissem e tge che lur finamiras sajan. In zic dapli avertadad quai che pertutga novs projects ed era la communicaziun, giavischa Muriel Stillhard.
La co-presidenta da l'uniun Sandra Adank manegia ch'ins haja anc potenzial da dumandar las commembras ed ils commembers activamain suenter lur basegns, quai hajan ins forsa era negligì in zic en il passà.
E sco ch'ins ha era pudì udir a chaschun da la radunanza generala, giavischan ils commembers e las commembras era stabilitad e cuntinuitad entaifer il team da Cuira Turissem. Quai ch'è – cun tantas midadas al timun – betg adina reussì ils davos dus onns.
