Atgnamain na datti gea strusch in meglier lieu per in center turistic che la staziun da la chapitala Grischuna. Atgnamain; mo quai ha Cuira Turissem vis in zic auter e decis da midar lieu, numnadamain si a mez il center da la citad, gist sper il Manor. Restructuraziuns planisadas per l'areal da la staziun da Cuira hajan dà in stausch a questa midada da localitad, uschia Renya Heinrich, ch'è dapi quest onn a la testa da Cuira Turissem.
Nus sperain er da vegnir pli fitg en contact cun la populaziun da Cuira – er quai è noss'incumbensa
Questa midada na saja però nagut tragic; mabain ina schanza. La schanza da sa posiziunar fitg attractiv, cun dapli visibilitad, a mez la citad da Cuira ed uschia er vegnir en contact cun la populaziun indigena.
Malgrà digitalisaziun – contact fisic resta impurtant
Ma dovri insumma anc in'infurmaziun turistica – ozendi, nua che gist la pandemia da corona ha dà in ferm stausch a la digitalisaziun? Bleras infurmaziuns as po chattar en l'internet, ils paucs nizzegian effectiv il contact cun in center d'infurmaziun turistic, tant en l'exteriur sco er en Svizra. Cler, manegia Renya Heinrich; corona haja bain dà in stausch a la digitalisaziun, però gist suenter la pandemia haja la branscha da turissem sentì che la populaziun schazegia il contact fisic. Ina maschaida tranter omadus saja dumandada.
I dovra il digital, il contact fisic è però gist uschè impurtant
Quella cumbinaziun, contact digital e contact fisic, duai er vegnida nizzegiada en il nov center turistic. Tranter auter cun moniturs d'infurmaziun che duain tant infurmar, sco er far reclama per las purschidas ed interpresas indigenas. La midada pia in gudogn per tut ils pertutgads, almain sch'i va tenor Cuira Turissem.