L'entschatta da l'onn ha l'Uffizi federal da communicaziun, BAKOM, surdà novas concessiuns. En la regiun Svizra Sidorientala ha il project Radio Alpin survegnì ella, e betg la Somedia cun ses radio Südostschweiz. Cunter quella decisiun ha la Somedia fatg recurs tar la Dretgira administrativa federala.
Stefan Bühler, il co-iniziant dal nov radio, spetga che la decisiun croda anc quest onn. Lura vegni er ad esser cler, tgi che survegn ils bunamain 3 milliuns francs. Quai ha el ditg envers il schurnal regiunal da SRF. Perquai sa preparan ins per l'entschatta da proxim onn.
Nus essan uss vid construir ils studios, nus avain cumenzà a recrutar persunal e nus avain gia empustà l'endrizzament per ils studios.
Chattar schurnalistas e moderaturs saja ina sfida. Dentant grazia a l'experientscha dal pionier da radio Roger Schawinski quintan ins da chattar la glieud. Gia avant ch'els hajan scrit or las plazzas, hajan els survegnì var 40 annunzias da persunas interessadas.
Da vart da la Somedia crajan ins er da gudagnar avant dretgira. Tuttina dettia malsegirezzas, uschia ha ditg il president dal cussegl d’administraziun da la Somedia, Silvio Lebrument.
Nus avain gia il 2008 fin 2013 cumbattì per la concessiun. Pia per nus è la situaziun malagreabla, dentant betg nova.
Tar l'agen persunal na badian ins la malsegirezza dentant betg – silmain quai che pertutga persunas che bandunan il RSO. Ed er sche la dretgira decida cunter la Somedia, veglian ins far vinavant cun RSO. Co ed en tge furma na saja anc betg cler. I vegnia dentant ad ir vinavant, uschia Lebrument.
