Brinzauls, antruras in vitg durmentà, daventa ussa senza vulair la scenaria d'in drama che occupa l’entir mund. La rapportaziun da Brinzauls s'extenda da l'Europa fin en l'America e cuntanscha perfin ils lieus ils pli lontans dal mund. Las medias sa bittan sin l'istorgia sco ferventas dramaticras e supereschan ina l'autra cun rapports che captiveschan il public. Mintga nivel da pulvra daventa ina metafra per l’incumprensibel, sco sch'el fiss l'ovra d'in reschissur surnatiral.
Sco orachels moderns fan expertas ed experts lur prognosas per predir e preannunziar il destin. I vegn mesirà, observà ed analisà e quai 24 uras a di. Blau – la colur dal desideri e da la clerezza – daventa in simbol da la peripetia, tut tenor punct da vista era da l’act final.
Tut è pront. Ma nus spetgain. Nus stuain spetgar.
Pertge ch’il protagonist, l’erox ed il malfatschent da l'istorgia è la muntogna. Ella ha temp e prenda temp. Ed igl è precis quai ch’ans irritescha e disturba. La natira è reschissura da quel toc. Ella na sa lascha betg impressiunar da nossas aspectativas ubain da noss plans. Las abitantas ed ils abitants da Brinzauls che han vivì onns ed annorums cun las lunas da la natira san quai exact. Ellas ed els èn s’adattads a las cundiziuns ed han emprais da viver ensemen cun la natira. Igl è bain precis quai che la situaziun actuala ans mussa.
Tge è Vossa opiniun? Jau ma legrel sin il barat:
flavio.bundi@rtr.ch