La capodovra da Steven Buchli è il mument in film da gangsters. Quel han ses team ed el filmà la stad e l'atun passà a Cuira.
In'emprima versiun tagliada han els era gia. Il mument fissan els atgnamain vi dal tagl definitiv. Quella «davosa glimada» na va tenor il reschissur dentant betg da far sur telefon u via Skype.
Quai è ina lavur intensiva ch'ins sto far «face to face» e quai croda il mument davent.
Atgnamain era planisà da mussar il film il november 2020 en ils kinos. Cun la situaziun actuala quinta il reschissur e producent dentant, che quai reusseschia pir il 2021. Il film n'haja er betg ina prioritad auzada.
Seria-web sin chommas falombras
In ulteriur project dal team è ina seria-web – pia in'istorgia cun pliras episodas, fatga per l'internet. Quai project han ins lantschà en favrer. Il mars hai anc bastà per surdar las rollas. L'emprima filmada è planisà per il prim da matg. Dentant:
Cun las mesiras da protecziun na pon ins betg filmar.
Sch'il Cussegl federal vegniss a schluccar las mesiras da protecziun, pudessan els tut tenor filmar intginas scenas anc il matg. Tut il project vegn probabel tuttina a sa spustar enavos.
Associaziuns appelleschan a la Confederaziun
Steven Buchli na lavura betg be en la sparta culturala. Sustegn da la Confederaziun u dal chantun na fetschia il mument betg da basegn en ses cas. Auter vesa quai or tar reschissuras e reschissurs u producentas e producents professiunals. Differentas associaziuns svizras da quellas professiuns fan perquai attent, che l'onn da film 2020 pudess avair «consequenzas finanzialas ed artisticas devastantas». Confederaziun, chantuns sco er las staziuns da televisiun duain perquai far tut il pussaivel per salvar ils films svizzers ch'èn il mument en lavur.
La Confederaziun ha mess a disposiziun 280 milliuns francs per la sparta culturala. Quels vegnan er dabun a la scena da film.
